ASTRAZENECA NAGPALYAR MAG-SUPLAY: City Hall naghanap ninibang supplier nin vaccine

Maabala naman an pag-abot kan suplay nin bakuna sa Ciudad nin Naga mantang apektado sa global demand asin dai na idadagos an pag-suplay sa ciudad kan AstraZeneca.

Alagad an solusyon naghanap nin ibang pharmaceutical company an City Hall asin nakaulay na an bagong supplier na iyo an DistriPhil, awtorisadong vaccine distributor kan COVAXIN.

Ini an mga pahayag ni Alcalde Nelson Legacion na nag-order na nin cincuenta mil (50,000) doses para sa 25 mil katao nin COVAXIN hale sa Bharat Biotech sa India. Afuera kan inisyal na cincueta mil na doses na order na pigpa-reserba kan City Hall igwa pang dugang na 100 mil doses kan COVAXIN.

An sinambit na Covid-19 vaccine aprubado na para sa Emergency Use Authority (EUA) kan Food and Drug Administration (FDA) kan nakaaging Abril 19, 2021 asin piglalaoman na maabot an suplay sa Hulyo ngunian na taon.

Sa FB post kan jefe ejecutivo an sinambit na vaccine igwa nin efficacy na dai man nagrarayo sa AstraZeneca (89 hasta 90 por ciento) pag-abot sa symptomatic Covid-19 patients.

An problema sa suplay nin bakuna an natatawan nin prioridad iyo si mga mayayaman na nasyon matapos makatao nin advance payment.

Bako lang an ciudad an apektado maging iba pang mga lokal na gobierno na nag-order nin AstraZeneca.

Igwa nang na-enot na nag-abot sa ciudad na mga bakuna alagad hale sa gobierno nasyonal na pigturodok na sa mga health workers, frontliners asin senior citizens.

Maging iba pang mga LGUs hale pa sa suplay kan Department of Health an saindang ginagamit na pang-ineksyon contra sa Covid-19.

Naka-order na an ciudad nin AstraZeneca para sa 180 mil na doses alagad an kumpanya nagsayuma na huli ta nagkukulang na an saindang suplay, kaya ngani dai na naglalaom an ciudad naghanap na nin ibang pharmaceutical company.

An ciudad igwa nang andam na fondo na nagcacantidad na nin P63 milyon hale sa dating P50-M. (dpa)