Augmentation force kan PRO5 tabang sa paz y orden sa Naga

Sa tabang kan augmentation force kan PRO5 sa Naga City Police Office dakulang bagay nganing maseguro an dalagan kan paz y orden sa nakatalaan na fluvial procession ki Nuestra Señora de Peñafrancia sa maabot na Septiembre 19, 2026.

An PRO5 sa pamamayo ni BGen Randy Glenn Silvio nagseguro kan saindang fuersa kan augmentation force asin mga miembros kan NCPO sa pamamayo ni Col. Rizaldy Caballero nganing maseguro an paz y orden siring kan nangyaring heneralmenteng matuninong na paz y orden sa traslacion procession.

Saludo si Silvio sa mga opisyales kan PNP na nagpaheling kan saindang ‘‘professionalism’’ sa tahaw kan ribo-ribong devotos ni Ina dawa na ngani igua man giraray nagpasaway. Maabot sa 2,600 na kapupulisan an nakawarak sa festividad ni Ina.

Pasalamat man an regional director sa publico na nagpaheling kan saindang cooperasyon asin suporta sa mga awtoridad para sa seguridad kan Festividad ni Ina.

Amay naman an saindang ginibong mga pag-andam kan tropa sa mga iwawarak na kapupulisan sa fluvial procession maging sa iba pang mga matahong lugar asin pagmantenir kan trafico.