Augmentation force pigpauranan nin batikus kan nakaaging fiesta

Ni Paulo DS. Papa

HENERALMENTE tuninong an pagselebrar kan Peñafrancia fiesta sa syudad nin Naga kan nakaaging Dominggo alagad an Multi-Agency Coordinating Group (MACG) pigpauranan nin batikus hale sa mga netizens, magin miembros kan media, huli na man sa kakulangan nin koordinasyon orog na sa mga augmented forces kan Philippine National Police (PNP).

An MACG pigbilog kan local na gobyerno kan Naga asin kan Arkidiyosesis kan Caceres tanganing mamantenir an paz y orden sa syudad, sa tabang kan mga uniformed personnel, mantang ini pigdadaguso nin mga peregrinos asin bisita para sa civic and religious activities kasumpay kan Peñafrancia fiesta.

Kan nakaaging Sabado, pigpasaraduhan an tolong mga mayor na tulay sa syudad iyo an Tabuco, Panganiban, Colgante asin Magsaysay durante kan Fluvial procession, bagay na ikinasuyang gayo kan mga residentes kan Naga.

An mga tulay na ini kan mga nakaaging taon libreng nakaka-agi an mga bisita asin mga debotos sa tulay alagad pigpapangaladan na mag-istambay tanganing pagdalanan kan prusesyon sa salog alagad kan nakaaging Sabado dae na pigpabaralyo pa kan augmented forces an mga tao sa mga tulay sa rason na mayo nin orden direktamente hale sa saindang mga haralangkaw na opisyal para sa pagpabalyong tulay.

Sa sarong pahayag pigsabi ni PSSG Roberto Aguillon, an deputy spokesman kan PNP-Naga, na makonduser an mga nanunungdan nin assessment meeting sa paglaom na dae na maotro sa sunod na taon an sobrang paghigot kan mga autoridad sa ngaran nin pagbalyo sa tulay durante kan aktibidad.

Susug sa sarong netizen, igwa nin mga nakiolay na maka-agi lamang sa tulay kan Panganiban huli na man ta mauran, barasa na an kaakian alagad an augmented personnel hale sa Sorsogon Provincial Police Office nagmatagas, nagsusunod sana sa orden sainda na bawal magpalaog sa tulay durante kan Fluvial.

Magin an mga miembros kan media na pig-isyuhan kan LGU nin orange sticker sa saindang mga ID para sa coverage kan kamugtakan kan prusesyon sa salog dae na man pigturugutan na makalaog sa anuman na tulay na pag-aagihan kan prusesyon.

Si Renne Gumba, direcktor kan Public Safety Office kan kasagsage kan prusesyon nagsabi na sa sarong group chat na palaogon an mga media personnel na may orange sticker sa mga tulay tanganing makatao ngani nin updates sa kamugtakan kan prusesyon na iyo an pig-aarabangan kan mga debotos na dae nagpasiring sa Naga alagad nagdadangog sa radio.

An orange sticker iyo kudta na su maserbing lyabe sa mga miembros kan media sa mga tulay tanganing maka cover kan aktibidad.

Naghagad nin dispensa si Aguillon para sa suboot kakulangan nin kooperasyon sa mga PNP personnel na pigpabantay sa mga tulay – bagay na pigtutugdo kan media komo rason kan dae ninda paggibo kan trabaho dara na man kan limitasyon.

An labi sa 1,300 na mga augmented personnel kan PNP hale sa opisina rehiyonal, kompwesto nin 299 personahe hale sa Camarines Sur Police Provincial Office (PPO), 252 hale sa Camarines Norte PPO, 203 SA Albay PPO asin 251 sa Sorsogon PPO.

An gabos na ini pigpabuwelta na sa saindang mga areas of origin nin mayong formal na send off ceremony segun pa ki Aguillon.

An mga ini nagin katuwang kan 815 na police personnel kan PNP-Naga sa pagtaong seguridad sa syudad durante kan fiesta, apwera pa sa mga personahes kan 9th Infantry Spear Division kan Philippine Army asin Philippine Coast Guard.