Aureus Family (Bulawan)

Sa laog nin duwang bulan kan naka-aguing Abril asin Mayo ngonyan na taon tolong prominenteng miyembros kan pamilyang Aureus kan ciudad nin Naga asin Libmanan Camarines Sur an surunod na nagtalikod sa kinaban.

Enot si Nilo P. Aureus, publisher sa solong regional newspaper na Bicol Mail nagadan huli sa helang na cancer sa edad na 70. Siya lider kan may pinaka-imfluenciang print media asin mainstream media en heneral, respetado pa kan simbahang Katoliko pati broadcast asin social media.

Sunod si Carlos Ojeda Aureus, primiadong parasurat(Palanca Awardee) asin English professor sa UP Diliman.

Ikatolo si Leon Aureus Jr, aki kadtong primerong mayor kan Naga asin publisher kan primerong Bicolmail, asin lider kan Tankong Vacang guirella movement sa Camarines Sur kan naka-aguing giyera mundial.

Si Jun Aureus member kan Ateneo de Naga high school batch 64, an pig-aapod ni Fr O’Brian na the best class na natukduan niya sa Ateneo. Kasarabay niya si Jimmy Arejola na valedictorian asin si Fr. Danny Imperial, salutatorian, Tony Hing. Siring man sa Jimmy Veneracion asin Domingo Llaga, mga primerong editor kan An Maogmang Lugar, Fred Araya na naguin regional PRO kan DENR sa Bicol asin Tomas N. Santos, aki ni Bienvinedo N. Santos na sikat na parasurat sa English. Si Tomas na champion kan Voice of Democracy national oratorical contest asin si Ben Milano na sikat na peace and development consultant na Filipino kan United Nations, Dr. Alipio Abad Jr, Cong Cho Roco, Diony Tubianosa, PRO kan Batasang Pambansa.

Dae ko malingawan si Jun Aureus ta kan bisperas kan sakuyang kasal kan February 24, 1975 sinda an nagdespidida de soltero sako sa paagui nin irinoman sa restaurant na saderi kan artistang si Celia Fuentes sagkod maagahon na kaaldawon na kan kasal. Kaiiriba sa Jim Arejola, Erasmo Pama, Henry Pardo asin iba pa na iyo na nag-gastos kan tiripon.

Duwang taon na enot sakuya pero an batch 64 iyo an sakuyang idol.

Mala baga ta alas 8:00 an sakuyang kasal pero alas 6:00 na kami nin aga nagsuruhayan.

Kan aldaw man na idto naglarga si Leon Aureus asin an saiyang agom pasiring Canada kun saen sinda nag-estar nin labing 50ng taon, may mga aki asin mga makuapo pa asin iba pang mga Bikolano na duman naman nag-iristar sgakod ngunyan arog ka Dr. Jun Dabu asin esposang si Emma Zaens, Kid asin Lina Requijo, Cesar asin Nemia Prado, Efren Salceda asin kadakul pang iba na duman nagtrarabaho, nagkapamilya asin an iba duman na binarawian nin buhay.

Arog kaiyan kahurugos an mga Bikolano kan panahon palibhasa dikit pa an tao kaidto. An iba nagtataga-puruli pa digdi mala ta tolong taon na an naka-agui kami ni Jun asin ni Nilo nagparangudto pa sa SM Naga.

An pamilya Aureus haraning marhay sako bako lang huli ta nagtrabaho ako bilang cub Reporter sa Bicol Mail kan 1968 durante kan Inter-scholastic Meet sa Pili. Kundi kadakul miyembros kan pamilya na harani sako personalmente arog ki Manuel na tugang ni Caloy na naka-estar sa New York, USA, idtong Malou Aureus Meliton na sakuyang kumadre, Si Leonor Aureus batch 68 na Santa Isabel asin iba pa.

Ngalas pati si Nilo ta nata mas dakul akong bistong Aureus kesa saiya na Aureus an apelyido. Si Nilo, si Jun asin si Caloy primerong magpinsan ta an ama ninda primerong magpinsan.

Ogma akong marhay na maguin harani sa prestiheyosong pamilyang ini. An mga Aureus taga-Naga asin taga Libmanan, pinaka-dakulang banwaan sa Camarines Sur.