Avian influenza sa CSur kontrolado na

Pili, Camarines Sur --- Nakalaog na sa Camarines Sur an Avian influenza sa duwang mga banwaan kan provinciang ini alagad dai dapat ma-alarma an mga may domestic poultry animals mantang nakontrol man tolos kan Department of Agriculture sa Bicol.

Si Dr. Josephine Bañadera, Regional Veterinary Officer kan DA nagpahayag an nagkapera sa mga barangay kan Bula asin Sipocot iyo an tinamaan nin virus sa ataman na pato na tolos man naagapan kan mga awtoridad na ginaradan asin nilubong sa hararom na daga an maabot sa 60 gabos na mga ataman na hayop nganing dai na mag-ulakit sa pagtaraig na barangay.

Pigkuanan nin mga sample mantang dinara sa opisina nasyonal kan DA para sa laboratory test asin na nagpostivo sa virus.

Hinagad kan DA Veterinary Officer sa may mga ataman sa backyard asin sa mga domestic poultry animals na i-osip tolos sa mga veterinary technicians nganing makuanan nin laboratory test asin dai na maglakop an helang sa manok o pato.

An mga Vet Officer sa LGUs padagos man kan saindang surveilance asin monitoring sa posibleng maapektaran an mga poultry products sa mga ciudad asin provincia.

An pag-alerto sa sainda nganing dai na makalaog sa saindang lugar an sinambit na virus nganing maagapan asin dai na magkalat.

An bird flu sarong highly contagious viral disease na kun haen an mga tinatamaan iyo an mga domestic poultry animals siring kan mga wild birds asin posibleng carrier kaini an mga migratory birds.

Nakakahawas palang an mga paraoma sa inatubang na African swine fever sa ataman na orig na dakul an mga nagkarulugi sagcod na-apektaran an presyo kan karning orig sa mercado yaon naman an avian flu.

Huli kaini, nangapodan an DA Bicol na dapat maging alerto an mga nag-aataman nin pato maging sa mga industriya nin poultry na dai maging pabaya mag-report tolos sa mga Vet officers. (dpa)