Ay Pilipinas

Gen. Gerald Bantag. Congressman Arnie Teves Jr. Pastor Apollo Quiboloy. Mayor Alice Guo.

Sa enot na paghiling, mapapa-bilib ka sa mga tawong ini ta anas titulado. Halangkaw an estado sa komunidad. Pero an mga tawong ini may mga ginibong maraot na dapat nindang panimbagan.

Si Bantag suspetsadong iyo an nagplano kun ano ta dapat gadanon an komentaristang si Percy Mabasa aka: Percy Lapid.

Si Teves suspetsadong inbwelto sa paggadan ki Gobernador Roel Degamo kan Negros Oriental kan Marso 2023 pati sa syam pang tawong nadamay.

Si Quiboloy may mga kasong sex trafficking asin cash smuggling. May warrant of arrest saiya an Senado.

Si Guo pighahanap kan awtoridad ta kwestyonable an saiyang pagka-Pilipino asin inaakusaran na may koneksyon sa mga ilegal na activities kan POGO (Philippine Offshore Gaming Operator) sa Bamban, Tarlac.

An hapot kan kadaklan ano ta dai pa naaaresto si Bantag, si Quiboloy, si Guo, o na-eextradite si Teves? Garo baga an mga Pilipinong wanted na mga mayayaman o nasa poder o may mga koneksyon sa kun kiisay-isay sa gobyerno, medyo pigkakawatan lang an mga kapulisan na may order na aristuhon sinda. Ay Pilipinas.

Kun bakong suya, anggot na an mga namamanwaan ta mayo man nangyayari apisar dai man kulang sa budget o resources an mga ahensya na dapat nagtatarabangan tanganing madakop ang mga dapat dakupon.

Pero pag-abot sa mga saradit na tawo arog kan mga pobre na may mga kaso o mga aktibista o mga unionista madalion madakop kan mga pulis. An iba ngani basta na lang ginagaradan arog kan si 30,000 poco mas o menos na nagin biktima kan Operasyon Tokhang ni Presidente Rodrigo Duterte sa laog nin anom na taon. Ay Pilipinas.

Dai ko maibitaran isipon na siguro may mga tawo sa manlaen-laen na ahensya kan gobyerno o mga pribadong grupo o indibidwal na nagtatao nin proteksyon sa mga tawong arog na Bantag, Teves, Quiboloy asin Guo.

Balita ngunian sa mga diaryo, midya sosyal asin sa mga TV kun pano nakaluwas sa Pilipinas si Guo na dai man lang naaraman kan Bureau of Immigration. Pano nangyari yan? May pigsuholan kaya si Guo sa Bureau of Immigration? Ano an ginigibo kan si mga pulis na dapat binabantayan ninda an mga hiro-hiro ni Guo? Naisip ko na naman lugod na dara kan korapsyon sa Pilipinas, mayong prinsipyo na dai nababakal kan kwarta. Kaya siguro nakadulag si Guo. Ay Pilipinas.

Maski an Department of Justice (DOJ) dai aram na mayo na palan sa Pilipinas si Guo puon pa kan Hulyo 18, 2024? Garo may breakdown sa komunikasyon an mga ahensya kan gobyerno na dapat nagtatarabangan. Ano an nangyari? Ay Pilipinas.

Pirang gatos na pulis an naghahanap ki Quiboloy pero sagkud ngunian ano ta dai pa nadadakop? Simple lang sa opinyon ko an rason kun tano dai nadadakop si Quiboloy: Maliban sa saiyang yaman aram kan gabos an koneksyon ni Quiboloy sa dating presidente na si Digong. Buddy-buddy an duwa. Siyempre dai sya pababayaan ni Digong.

Dagdag pa kaiyan may mga tawo sa gobyerno, arog ni Bise Presidente Sara Duterte, Senador Bato de la Rosa, Bong Go, asin Robinhood Padilla na risang marhay an pagsuporta ninda ki Quiboloy. Mala ta pig-akusar pa ngani ni Bato an kapulisan na naggamit daa ni sobrang pwersa (excessive use of force) sa pag-raid sa compound kan Kingdom of Jesus Christ (KJC) ni Quiboloy sa syudad kan Davao kan nakaaging Hunyo. May mga protektor si Quiboloy. Kaya makusog an buot nya na dai magsurrender. Ay Pilipinas.

Daing gayo ako nagngalas kan si Teves, na may kasong murder, nakadulag sa mga awtoridad sa Pilipinas kan 2023. Arog ni Quiboloy mayaman si Teves, may sadiring eroplano, deputado, may koneksyon sa mga darakulang tawo sa gobyerno. Sigurado akong ginamit ni Teves an saiyang kwarta asin impluwensya nganing makaluwas sa Pilipinas. Ngunian na nakaluwas na sa priso si Teves sa East Timor, ano ta dai pa na-eextradite sa Pilipinas?

Sa maabot na Oktubre 2024, duwang taon nang gadan si Lapid. Duwang taon naman na dai pa nadadakop si Bantag na suspetsang nagplano sa pag-ambush ki Lapid. Ano ta dai pa nadadakop si Bantag? Ano an masasabi kan DOJ? Ano an masasabi kan PNP? Ano “lista sa tubig” na naman an kasong paggadan ki Lapid ta sarong heneral an numero unong suspek? Dai ko maibitaran na magsuspetsa na may mga protektor si Bantag, kun bakong kapareho nyang pulis, mga tawong may impluwensya. Ay Pilipinas.

Saro lang sa hiling ko an gustong sabihon kun ano ta dai pa nadadakop si Bantag, si Teves, si Quiboloy asin si Guo: May mga protektor sinda na mga kapuwa Pilipino. Ay Pilipinas.