Ayuda

Mayo daw nin ayuda an gobyerno sa mga tao kaidto. Alagad ngonyan an badyet nasyonal panu-pano nin pan-ayuda sa mga parauma nabiktima kan importasyon nin mga produktong agrikultural arog kan bagas, karneng orig asin sibuyas.

Pati an mga drivers nin dyip na biktima kan modernisasyon sa linya nin transportasyon may ayuda pa. Pati ngani an mga paratinda nin bagas tinatawan pa nin ayuda tanganing maglangkaw an saindang delhinsya.

Maski sa lado lokal lalo na kun panahon nin kalamidad arog kan bagyo, kasulo asin linog pati pagtuga nin bulkan na nakaka-apektar sa mga tao tinatawan kan gobyerno.

Kadaklan kan mga ayudang ini para sa mga taong nagtitios kun minsan biktima sa salang policy kan gobyerno. Orden kan Malacañang o executive department, Camara Baja asin Camara Alta (senado) na nagpapa-pogi sa problemadong populasyon.

Iyo baga yan an votebuying o barakalan nin boto maski harayo pa an eleksyon. Segi pati an pa press release o praise release ( propaganda ) kan mga nasambit na ahensya asin kan mga lokal na gobyerno na nagtatao man nin ayuda hali sa saindang lokal na pondo.

Hapot kan mga namamanwaan, bakong paagui nin votebuying yan?

An pagtao nin pansit, sardinas, kape asin asukar sa mga tao igwa o mayong kalamidad saro pa nin paagui nin pagbakal nin boto.

Mamamasdan mo yan durante kan karampanyahan asin kan naguiguin resultado kan pirilian. Kun iisipon mayo nang politiko ngonyan. Gabos na negosyante. An nagpapabakal asin nagbabakal pareho negosyante.

Kaya an nagkokontrol sa satuyang ekonomiya hali sa itaas mga dakulang kapitalista, elitista sa politika asin ekonomiya, higanteng oligarch, gabos darakulang negosyante na konektado sa mga negosyanteng mga politiko maguin sa kongreso o sa LGUs.

Iyan an mamundong kamugtakan kan buhay nyato ngonyan.