Badil Na Kuldasan

Dai na nanggad maibabalik pa an nakaaging panahon ta mas maogma na satuya nang atubangon ang mga bagong sistema nin buhay ngonian. An mga gurang parating nag sasabi na kan sinda daa mga aki pa dai pa uso an internet asin computer asin mayo pang ideya na madidiskubre an cellphone. An mga kawat kaidto kan mga aki iyo an mga simpleng bagay na nakukua sana sa palibot kan harong , asin ang saro sa kawat na sakuyang dai nanggad malilingawan iyo ang Badil Na Kuldasan. Kaming mga aki na yaon pa sana sa elementarya iguang mga sadiring “badil” na an bala iyo ang bunga kan kuldasan, sarong klase nin doot na nakukua sa mga gilid kan dalan na an solamenteng pakinabang iyo ang bunga kaini na matagas asin iguang ikog-ikog na bagay na gibohon bala sa de-lastikong badil-badil na malanit man an tama sa lawas kan mga aki. An kawat na mag baradil-badilan tunay na maogma ta samuyang pig aarog an nadadalan sa mga pelikula ni FPJ, Jun Aristorenas, Jess Lapid, asin ni John Wayne sa mga pelikulang kowboy sa America. An samuyang badil formardo nin riple ta ini halaba ta dai man bagay sa kuldasan “ Calibre .45”. An “baradilan” ginigibo kung madali nang mag bangui ta nakapahingalo na hale sa escuelahan. An mga aki kaidto, igua na nin sadiring kadunungan nin isip ta antes nagkaka igua nin “baradilan” nag oorolay muna kan tamang reglas, arog baga kan bawal an mag tira sa mata ta ini delikadong makabuta, mayo nin diskwalifikasyon na maski gurano an tama sa aki, ini dai nanggad “nagagadan” asin sige sana an laban. Sa kawat na Kuldasan, an importante idtong nakakahawig sa baradilan sa sinehan , mayong nanggagana mayong nadadaog. Masiramon sa pag mati kan sarong aki na an saiyang badil nakatama sa pig target na “kalaban”. Tanganing magayon an baradilan, an saimong “riple” magayon asin pusog an pagka gibo, makusog an ginamit na lastiko tanganing marikas ang dalagan kan bala kan kuldasan ta garo man sana siya eskopita. Maogmahon an buhay kan mga aki maski mayo nin cellphone asin computer, basta ang imporante sainda, iyo na pag abot hale sa escuela, tolos kinukua an saiyang “riple” na nakatago sa irarom kan katre, may mga kuldasan sa bulsa asin ang direksyon duman sa tinampo mahanap nin “kalaban” sa baradilan nin kuldasan. An mga gurang ngonian, istorya na sana an dara kasabay kan pag giromdom kan mga naging “kabadilan sa kuldasan”. Mayo na akong ideya kung yaon na sain si mga kalaban ko sa kuldasan. Mayo na akong ideya kung kumusta na si Jun Velasco na ultimo kong naaraman naging lathe machinest ni Elizalde duman sa Manila, an iba nagtalikod na sa kinaban, igua man saro pa si Ruding na yaon na sa ibang barangay asin dai na nakakapasyar sa centro ta siguro kinukulog na kan rayuma. Mayo man nanggad kaidto nin computer, mayo nin cellphone, alagad yaon an kuldasan na tunay na maogmang pag kawaton.