Bagong 20MVA solusyon sa mga brownout-Casureco II

Pili, Camarines Sur --- An Camarines Sur II Electric Cooperative (Casureco II) nagseguro sa ribo-ribo miembros-consumedores kan kooperatiba na sa banwaan na ini na dakulang bagay an pagkaigwa na nin bagong 20MVA power transformer puon kan Viernes, Agosto 13 nganing mahale na an mga reclamo sa mga brownout.


Ginibo an blessing and energization kan bagong power transformer sa Pili Sub-Station kan Agosto 13 sa pangenot ni General Manager Melit Candia, Board President Gay Pabines Director Domingo Changcoco kan Pili District asin iba pang mga direktor kan Casureco II mantang presente an mga opisyales lokal kan kabisera kan provincia sa pamamayo ni Alcalde Tomas Bongalonta.


Sinabi ni Candia sainda nang niribayan an 10MVA power transformer na perang decada nang ginagamit mientras nagparalangkaw an konsumo nin suplay nin kuryente sa banwaan na ini huli ta nagparadakul an mga darakulang establisimiento asin nagparadakul man an konsumedores kaya ngani apektado na an suplay kan kuryente na nagiging causa nin mga brownout.


Nagpahayag man nin pasalamat si Alcalde Bongalonta na dai nalingawan kan kooperatiba an kabisera kan Camarines Sur na maninigo lang suficiente an suplay nin kuryente nganing dai ma-apektaran an mga negosyo maging konsumedores.

Binabasbasan an bagong 20MVA power transformer sa Anayan Sub-Station kan Casureco II na maserbe sa enterong mga barangay kan Pili, Camarines Sur asin porsyon kan Minalabac, Camarines Sur.



Si Rinner Bucay, opisyal na parataram kan Casureco II nagpahayag an 20MVA para sa enterong coverage area kan porsyon kan Minalabac, Camarines Sur.


Dati-dati kan 10MVA sana an ginagamit kan Anayan Sub-Station mantang kulang na an suplay nin kuryente sa banwaan na ini nagkukua sa 40MVA power transformer sa barangay Del Rosario, Ciudad nin Naga.


An 10MVA hali sa Anayan Sub-Station ibabalyo sa Minalabac, Camarines Sur alagad posibleng marealisar sa sunod na taon 2022.


An Minalabac asin Milaor makua pa nin suplay nin kuryente sa 40MVA sa brgy. Del Rosario, alagad pigcierto ni Bucay na mayo nang mangyayaring pag-overload sa Naga Area nin huli ta suhay na an power transformer kan Pili District.


Afuera pa kaini, sa ika-tolong cuarto ngunian na taon nakatalaan basbasan an bagong Sub-Station sa barangay San Felipe, Ciudad nin Naga.


Sinabi pa ni Bucay an pag-instelar nin dugang na mga sub-station kan kooperatiba saro sa solusyon sa kritikal na ngunian na nagpaparalangkaw an konsumo nin kuryente. (DPAureus)