Bagong AGM kan Casureco II dating proj supervisor kan Aleco

Dai nahaloy sa posisyon bilang OIC General Manager si Manzah J. Favorito kan Camarines Sur II Electric Cooperative (Casureco II) Inc., an National Electrification Administration (NEA) nagdesignar tolos nin AGM nganing magtukaw sa laog nin anom na bulan.

Si retiradong NEA Deputy Administrator Edgardo Piamonte na dating Project Supervisor kan ‘‘ailing cooperative’’ Albay Electric Cooperative (Aleco) sa provincia nin Albay nag-asumir na sa puesto kan Jueves, Hulyo 6, 2023.

Siya iyo an pigdesignar ni NEA Administrator Antonio Mariano C. Almeda na madestino sa Casureco II sagcod sa anom na bulan alagad kun dai pa nanonombrahan na permanenteng general manager magpapadagos sa posisyon.

Sinabi ni spokesperson Rinner Bucay kan Casureco II na an NEA iyo an mapili sa mga aplikanteng GM nganing magtukaw sa nabakanteng puesto ni dating GM Emelita Candia, na nagretirong amay poon kan Hulyo 1, 2023 huli sa ‘‘health reason’’.

Siya nagbakasyon nin sarong bulan kan Hunyo 2023 asin si Favorito iyo an tinukahan kan junta directiva na mag-asumir komo OIC GM.

Si Favorito piglalaoman na saro sa calificado nganing mag-apply sa nabakanteng puesto ni Candia.

An manijamiento maging mga empleados nagpapabor na dapat hale man sana sa laog kan cooperativa an tukahan kan NEA bilang permanteng general manager. An ponto aram na an pagpadalagan kan dakulang cooperativa sa provincia asin aram na an dating mga problema na madaling natatawan solusyon. (dpa)