Bagong hepe pursigido sa pagmantenir kan paz y orden

Ni Sonny Malate

Lagonoy, Camarines Sur - Pursigido sa pagsustenir  kan paz y orden sa localidad si PMAJ John Michael P. Miraflor  na nag-asumer bilang Officer-in-Charge kan Lagonoy Municipal Police Station (MPS)  kan Mayo 1, 2026. 

Susog ki Miraflor, sa presente an saiyang prioridad iyo an campanya kontra sa illegal na droga asin an  paglaban sa krimen sa persona asin pagrurogaring. An Lagonoy consideradong drug cleared na alagad an MPS padagos na marigmat sa mga personang invuelto digdi.

Dagdag kan OIC, regular an ginigibong  checkpoint duwang beses kada aldaw sa mga stratehikong lugar asin an pagpadanay kan police visibility sa comunidad. Padagos man   an   pagpautob kan mga  significante asin special laws  para sa katiwasayan kan kapalibotan. 

Siring man, an actibong pakikipagtabangan sa local na gobyerno asin ibang ahencia para sa pagpautob  kan  mga programa asin actividad  katakod sa mandato ninda bilang lead agency dapit sa paz y orden. 

Segun ki Miraflor, an suspension kan pagdeputize kan Land Transportation Office (LTO) sa mga personahes kan PNP pighale na kan nagtalikod na semana. Huli kaini may dagdag nang ngipon an  saindang pagsitar,  pag-isyu nin citation  ticket o pag-impound kan vehiculo kan mga  pasaway na mga motorista. 

Nangapodan si Miraflor sa mga motorista na magkuyog sa mga panundon dapit sa pagparehistro nin vehiculo, pagkoa nin driver's license, paggamit nin full-faced helmet asin pagsunod sa mga leyes  sa trafico. 

Nagpagiromdom man siya sa mga magurang na dae pagtugotan an mga aki na menor de edad na magpadalagan nin motor. Pigtawan niyang doon na iguang simbagon sa irarom kan ley an  magurang na nagconsente sa mga aking menor de edad na nagpaparuhab nin motorsiklo.

Manonotaran na kadakol nang veces na nainvueto an mga buyong na mga hubenes sa aksidente sa motor orug na pagkabanggi. Ini an minaresulta sa danyos sa hawak asin minsan sa pagkawara nin buhay.

Mientrastanto, sa community engagement kan MPS, actibo man an Pulis sa Barangay kun saen an kada barangay iguang designadong Police focal person para sa man-iba-ibang pangangaipo kan residentes. 

Dae man mismo presente sa  nakatukang  barangay alagad marikas na nasisimbagan kan Police focal person an   pangagaipo kan residentes. . Sa paagi kan teknolohiya asin social media marikas an comunikasyon, intervention asin  action.

Parte man kan best practice asin good deees, an MPS an nag-eextendir nin tabang sa namamanwaan sa paagi nin material na bagay arog kan bottled water, bagas,  dikit na grocery asin iba pang kaipong ayuda kaya apreciado kan publico. 

Bilang bagohan sa destino, nagpapasalamat si Miraflor na suportado sinda ni Alkalde Dyego Luiz H. Pilapil. An regular na  fuel allocation hale sa LGU an dakolang tabang  sa saindang ginigibong pagpatrolya asin official travel sa paagi kan tolong patrol car ninda. 

Si Miraflor an nangapodan kan cooperacion kan mga namamanwaan sa mga esfuerzos na ginigibo ninda para sa katrangkilohan kan comunidad. Sa paagi kaini nagigin efectivo an actividad  kontra sa criminalidad, illegal na droga, pag-abuso sa kapalibotan asin pagbalga sa mga leyes sa trafico.