Bagong RD kan PNP Bicol nagpaapod command conference

Ciudad nin Legazpi --- An doktrina sa command responsibility asin pag-responde kan mga miembros kan PNP saro sa mga mayor na tinawaan importancia ni BGen Nestor Babagay Jr, bagong Acting Regional Director kan PNP Bicol sa saiyang premirong pinaapod na Command Conference sa Camp Gen Simeon Ola, Ciudad nin Legazpi matapos kan saiyang formal na pag-asumir sa pwesto kan Hulyo 16.

An conferencia inatendiran kan Command Group, Regional and Personal Staff, Provincial Directors asin mga jefe de pulisya.

Kabale sa saiyang pigbiklad iyo an estrictong directiva ni PNP Chief Gen Nicolas Torre III na makaskas na pagresponde sa laog nin cinco minutos, pagtao nin tolos solusyon sa krimen asin pag-arestar sa mga wanted person, magigibo nin mga estratihicong iniciativo asin pagseguro kan paz y orden.

Afuera pa kaini, saiyang pinagirumdum na dapat maging senciro sa misyon an mga miembros kan PNP sa paz orden na maging marikas an pagserbe sa comunidad.

Si Babagay, sarong Bicolano asin taga Ciudad nin Iriga sa Camarines Sur iyo an nag-ribay ki BGen. Andre Dizon nadestino na sa PNPA sa Ciudad nin Cavite.