BAGYONG ENTENG: Nagwalat dakulang danyos sa sektor agricultura sa Bicol

Lakop na tubig baha, tolo gadan

Mahiwas na kaomahan sa Brgy. San Lucas, Calabanga, Camarines Sur kabale sa ginatos na hektarya na apektado kan tubig baha huli sa Bagyong ‘Enteng’ (DPA)

Ginatos nin mga paraoma sa Bicol an nakataruk na sa saindang omahan para sa sibagat saka iguang nagbabados na paroy alagad dakula naman si danyos mantang inabot nin tubig baha huli sa laila nin maghapon na uran dara kan Bagyong ‘'Enteng’’ kan Domingo, Septiembre 1, 2024.

Pigtutubodan na posibleng mag-abot sa P400 milyones an danyos bako lang sa omahan envez sa mga tinanum na gulayon na makaapektar sa suplay sa mercado.

Si Lovella Guarin, regional spokesperson kan Department of Agriculture (DA) sa Bicol nagpahayag nakaabot na sa saindang opisina an destroso na winalat ni Bagyong ‘Enteng’ asin sa ngunian padagos na nindang pigkokolecta an mga damage report hale sa manlaen-laen na Municipal Agriculturist Office (MAO) sa mga LGUs. Dai pa napaluwas kan kumfirmasyon kun pera an total na danyos sagcod sa sinusurat an baretang ini.

Nag-aandam nin ayuda siring kan banhi an ahencia nganing matabangan tolos an sektor agricultural.

An Rehiyon Cinco saro sa may halangkaw nin produksyon nin paroy mala ngani nagsusuplay pa nin bagas sa ibang rehiyon alagad apektado matapos kan calamidad.

Sa Coast Guard Bicol, pinahayag na abot sa 800 na pasajeros an na-stranded, mantang may 259 rolling cargoes, 26 vessels, asin duwang motorboats. Matapos maghale sa Bicol si ‘'Enteng’’ tinugotan na kan PCG nganing makaabante kan saindang viaje sa dagat.

Sa report pa kan CCG duwang parasira an nagtahaw sa kadagatan sa Catanduanes sa tahaw kan nangyayaring bagyo na ngunian segun sa osip nawawara.

LAKOP NA TUBIG BAHA, TOLO GADAN

An bagyo piglalaoman kan Philippine Atmospheric and Geophysical Astronomical Services Administration (PAGASA) na may laila nin makusog na pag-uran sa 100 hasta 200 melimetrong tubig alagad naglampas pa sa 280 melimetro na naging dahilan nin mga tubig baha dawa sa mga kalangkawan na lugar.

An Department of Education sa rehiyon nagsuspende kan gabos na klase poon sa elementarya hasta sa tertiary maging an ibang LGUs nagsuspende kan saindang trabajo epekto kan tubig baha. Iguang mga lugar sa Bicol na baha pa an mga escuelahan nagpadagos pang cancelado an klase sa gabos na lebelo.

Tolo an mga binawian nin buhay sarong nakuryente sa Barangay Concepcion Pequeña, sarong senior citizen na inatake sa puso huli sa tubig baha sa Barangay Igualdad na tolos dinalagan sa hospital, binawian man giraray buhay asin sarong walong bulan na aking babae sa Barangay Calauag nalamos sa tubig baha sa cuarto matapos mahulog sa saiyang higdaan inagapan nganing darahon sa hospital alagad binawian nin buhay, an mga insidenteng nangyari gabos sa Ciudad nin Naga.

Igua pang mga classroom na nalubog sa tubig baha mala ngani pati mga gamit sa opisina siring kan computer, mga libro asin iba pang papeles an enterong nagkabarasa.

Minalabac National High School sa Minalabac, CamSur saro sa mga nalubog sa tubig baha na escuelahan sa provincia. (Photo-MNHS’sers)