BAHAYanihan ni VP Leni dinara na sa CSur

Si Bise Presidente Leni Robredo dinara na sa Camarines Sur an sunod naman kaining housing project inapod na BAHAYanihan sa mga residentes kan barangay na nawaran nin estaran huli kan sunod-sunod na bagyo sa rehiyon Bicol kan Noviembre 2020.

Dai na pinaaram sa media an housing project alagad sa pinaabot na inpormasyon kan mga benipisyario sa Bicol Mail an proyecto namumugtak sa Lupi, Camarines Sur nagpapadagos na ngunian mala ngani maabot na sa cuarentang harong an madali nang matapos.


An mga materyales sa konstruksyon dara kan bise presidente kan siya magbisita sa Lupi, CSur katuwang an saiyang mga ka-partners.


An Bahayanihan project pigpunan kan Deciembre 2020 matapos kan sunod-sunod na bagyong Rolly asin Ulyses.


Sinabi pa 119 mga harong an dapat matapos na pigtataramangan kan mga benipisyario na namumugtak sa gilid kan Highway kan Barangay Poblacion, Lupi, CSur.


An natabangan na familia si mga nagabaan nin harong kan nakaaging calamidad asin perming binabaha an lugar


An kaparejong proyecto sa Bicol nagpuon sa Barangay Mautaro sa Guinobatan, Albay nganing matabangan an mga familia na nawaran nin estaran huli kan nangyaring paghuros kan lahar kasunod kan paglamasa kan makusog na bagyong Rolly.


Kabale sa ka-partner kan bise president iyo an University of Nueva Caceres’s College of Engineering na iyo an naggibo kan designed kan housing project.


Kan Sabado, Febrero 13 an UNC iyo pa an nagpa-seminar sa livelihood project sa mga benipisyaryo.


An lokal na gobierno kan Lupi, Camarines Sur sa pamamayo ni Alcalde Lilian S.A. Matamorosa iyo man an nagtao kan relocation site, nagpadara nin mga foreman, pagtao nin mga pagkakaan sa mga obreros na familia na kabale sa mga benipisyaryo kan proyecto mantang igwa pang suplay nin bagas hale sa opisina kan VP. (DPAureus)