Bako gabos na 4Ps libresa kuryente - Casureco II

Bako gabos na miembros kan Pantawid Pamilyang Pilipino Program (4Ps) libre sa consumo nin kuryente envez an mga benepisyaryo sana si mga nagcoconsumo nin 0-50 kWh cada bulan marecibe nin 100 por ciento.

Piglinaw kan Camarines Sur II Electric Cooperative (Casureco II) sa paagi kan saindang opisyal na parataram Rennir Bucay, si mga nagcoconsumong sobra sa 0-50 kWh dai kabale asin magbabayad kan tarifa na pig-iimponer kan cooperativa nin electricidad.

Segun sa Casureco II an gobierno iguang mandato sa ‘‘Lifeline Rate Subsidy Program, (LRSP)'' para sa electricity discount sa mga low-income siring kan 4Ps alagad si nagcoconsumo nin sobra sa mandato obligado na magbayad.

Base sa Joint Resolution No. 01, serye kan 2026 entre kan Department of Social Welfare and Development (DSWD), Department of Energy (DOE), asin kan Energy Regulatory Commission(ERC), an mga familia kan 4Ps na nagcoconsumo nin 0-50 kWh cada bulan awtomaticong kabale sa 100% na discuento.

Naglangkaw an singil sa tarifa nin kuryente kan mga cooperativa nin electricidad alagad dakul na miembros kan 4Ps nagcoconsumo na sa pigtaong diskwento asin naglangkaw kan saindang babayadan sa power bill cada bulan.

Sinabi ni Bucay kun an saindang consumo 0-50 kWh padagos man giraray na makaka-aprubetsar sa programa kan gobierno.

An listahan kan mga miembros kan sinambit na sektor hale sa opisina kan DSWD alagad an miembros consumedores na 4Ps obligado man giraray na mag-fill up sa forma, sabi pa.

Dinagdag pa kan Casureco II na si pangako kan sarong candidatong senador na yaon na ngunian sa pwesto na libre sa power bill kun nagcoconsumo nin dos mil pesos, ''sagcod sana man sa pangako dai man nangyari’’