Bako palan surubahan (an maguibo nin libro)



Hali sa sakuyang sadit na estada sa barangay San Jose, Milaor Camarines Sur nagsurat ako nin mga rawit dawit, artikulo para sa mga dyaryo asin mga komentaryo para sa radyo asin peryodiko pero dai nungka ako naghuna na masurat o maguibo nin sarong libro.


May mga sinurat akong columns kaidto sa man iba-ibang dyaryo lokal arog kan Vox Bikol, Bikol Monitor, Bikol Reporter asin iba pa pero mayo lamang plano na magsurat nin libro. Iba pa ngani an mga pangaran na gamit ko arog kan Gumersindo B. Valladolid, Oca de Naga asin “Anonymous”.


Haloy ako sa radyo bilang komentarista, field reporter, news analyst, production manager na nagtutukar kan manlaen-laen na isyu nasyonal asin lokal na iyo an mainit na pig-oorolayan kan dekada 60-70-80 sagkod 90.


Naguin akong manager nin radio station, production manager, news director, information editor, PRO asin parapahayag.


Naguin pang politiko---vice mayor, naguin presidente pa kan Vice-Mayors League sa enterong Camarines Sur, mayor na naguin secretay general kan mayors league sa provincia asin provincial board member na napili pang secretary general kan Provincial Board Members League of the Bicol Region.


Sa lawig kan sakuyang trabaho bilang servidor sa gobyerno asin kan banwaan naguiromduman ko na ako palan ordinaryong tao sana kan ako na magretiro.


Sampulong taon na an naka-agui kan punan nang kaulayon ako kan ibang mga taga-media, politiko asin mga kaamigo na panahon na tangarig magsurat ako nin libro.


Kan panahon na idto kan ako na nagtatara-tambay na lang sa SM-“Kantong Putikon” kaulay an mga kapwa retirado asin pensionado kan bigla pa akong dulukon kan mga taga Ateneo asin simbahan na magluwas sa mga pelikula na pigpapasale sa Peṅafrancia Short Film Festival kada Setyembre sa laog nin tolong magkasunod na taon, nagluwas ako sa mga haralipot na pelikula na pigpasale man sa mga senihan sa Naga asin an saro napiling Best Picture kan 2015 idtong “Laboy Niamo”. Obispo an papel ko sa nasambit na pelikula.


Kan magpoon nang magdulok sako an mga amigo kong parasurat arog kadto ki depuntong Ben Babar, publisher kan Bikol Reporter, Frank Peṅiones, parasurat, asin visual artist, Vic Nierva professor, layout artist, book designer asin tunay na Bikolista na pigpipirit akong magsurat nin libro dahil daa ta dakul akong eksperyensya, gulpi akong kabisto asin amigo na dapat iwaras ko sa publiko tangarig dai malingawan kan banwaan an mga pangyayari sa politika asin sa media na sakuyang inaguihan kan naka-aguing panahon.


Orog na nagbukas an isip ko na isurat talaga sa libro an mga naguiguiromduman ko kan panahon kan kaulayon ako kan publisher kan Bicol Mail na si Nilo P. Aureus kan 2018 na magsurat nin column sa Bicolmail.


Sabi ko bastang sa tataramon nin Bikol OK. Poon kadto sagkod ngonyan pigsusurat ko na sero-semana an sakuyang column sa Bicol Mail sa tataramon na Bikol.


Sabi kan mga amigo ko pakalihis nin sangtaon iyo man sana ta dakul ka nang naisurat na column tiripunon mo na sa sarong libro.


Iyo man nanggad an guinibo ko na an titulo “INI an TOTOO” susog sa column ko sa peryodiko asin an mga tema tungkol sa politika, media, pamilya, estorya asin kadakul pang iba.


Ngonyan nagluwas na an libro sa tabang ni publisher Aureus kan naiyo an responsible sa pag-imprinta kan libro, si Vic Nierva an nag-layout asin nagdesign asin nag-edit kan 253ng pahina kan libro, an sakuyang manugang na si Haide E. Verdadero an nag proof read katabang si Rey Perez kan capitolyo.


Dapat kan Hulyo pa kuta na nahaman an libro pero dahil sa pandemya, si Vic nagpositive sa Covid, nagpara-uran pa sa Metro Manila kun minsan mayo nin kuryente kaya naapektaran an saiyang guibo.


Nobyembre 7 durante kan sakuyang kompleanyo kan ipresintar sako an enterong libro alagad nai-imprenta haros Enero na ta inabot na kan Christmas asin New Year holidays asin kadakul nang political campaign paraphernalia pigtatrabaho sa Gold Print.


Kan ianunciar ni Mr. Aureus na haman na an libro, pig-anunciar sa mga radyo asin may press releases sa peryodiko dakul na an order na magbakal nin libro bako lang pati digdi sa Naga o Camarines Sur kundi sagkod sa Metro Manila asin sa abroad sa East Coast asin sa West Coast kan Amerika, sa Hongkong, sa Singapore, Australia asin Europa.


An maconsuelo ta an book launching sa Pebrero 6 pa, sa Connie and Ervin Borja Farm sa Libis, San Isidro, Magarao alagad dakulon na an benta.


An book launch 3:00 nin hapon Pebrero 6 aldaw na Domingo tampok an mga imbitadong mabarakal kan libro arog kan mga taga media, mga politiko asin mga negosyante.


An publiko en heneral imbitado man.


(May mga nag-oofrecir maglansar kan libro sa Savage Mind bookshop sa Naga asin sa Mangente Resort sa Balatan Camarines Sur. An libro mababakal na ngonyan sa Gold Print/Bicol Mail Naga, St. Paul Bookstore sa atubangan kan Universidad de Santa Isabel, Savage Mind Bookshop sa City Heights Naga asin sa residencia kan autor sa Milaor, Camarines Sur o sa Villa Corazon Subdivision sa ciudad nin Naga).