top of page

Bakona vs ASF yaon pasa pag-aadal kan FDA

Igua nang bakona contra sa African Swine Fever (ASF) hale sa nasyon kan Vietnam alagad pendiente pa sa pag-aadal kan Food and Drug Administration (FDA) nganing macierto na daing epekto sa ataman na orig.


Ini an paliwanag kan Department of Agriculture (DA) Bicol sa paagi kan parapahayag Ms. Lovella Guarin kasunod kan mga kahapoton kan apektadong paraoma na nag-aataman nin hayop sa Tiwi, Albay na apektado kan virus sa hayop.


Kan Hulyo 2023, an Vietnam iyo an nakaimbento kan bakona contra sa ASF na nagluwas sa mga bareta an sinambit na nasyon ma-export nin dos milyon na vaccine doses nganing i-suplay sa Filipinas na naglalangkaw si caso sa ibang mga lugar.


An suplay nin bakona nganing makontrol an ASF epidemic. Rinibong paraoma an na-apektaran kan virus sa hayop mala ngani kan nakaaging taon nagparamahal si presyo kan karneng orig sa mercado.


Alagad an FDA sagcod sa ngunian dai pa napaluwas kan resulta sa busising pag-aadal sa laboratoryo.


Sa Tiwi, Albay labi na sa 300 nin ataman na orig an ginaradan asin dagos nang tinalbong nganing dai mag-ulakit.


Tolong barangay sa sinambit na banwaan an apektado kan ASF na kinababalehan kan Horoan, Mariit asin Lourdes. An Provincial Agriculturist Office sa Albay nagpatanid na sa pagtaraid kan tolong barangay nganing dai na maulakitan hale sa virus.


An DA nagpaluwas fondo nganing matawan nin ayuda an nasa 72 na paraoma nin tig-a P5,000 cada payo na pig-depopulate. Limitado sa veinteng payo nin orig an puedeng mabayadan alagad kun nagpaseguro sa PCIC an hog raisers an sobra sa 20 payo an insurance company iyo an dapat magbayad.


Dinagdag pa ni Guarin na si nangyari sa Daet, Camarines Norte asin Bula, Camarines Sur kontrolado alagad mahalat nin 90 diyas nganing ideclarang ASF free.


Nag-apelar an DA sa mga paraoma na kun iba na an hiro-hiro kan saindang ataman na hayop isombong tolos sa ahencia nganing makontrol tolos an paglakop kan virus.

DA BICOL NAGBUKAS NIN BAGONG SATELLITE OFFICE


Igua nang bagong Satellite Office an opisina rehiyonal kan DA Bicol nganing makataong technical assistance asin iba pang serbisyo sa mga paraoma, estudiantes, saka researchers, alagad ini bilang DA-Philippine Carabao Center (PCC).


Segun pa sa parataran kan DA an opisina nagcacantidad nin P2.36 milyon asin parte kan programa nganing mapaasenso an saindang livestock program services.


Dakulang tabang sa mga estudiantes asin researchers nganing dai na magdayo sa ibang lugar.


An SO na namumugtak sa Barangay San Agustin, Pili, Camarines Sur o sa laog man sana kan laguerta kan ahencia magkakaigua nin ‘‘liquid nitrogen generator plant’’ na magiging operational sa masunod na mga bulan asin katuyohan kan ahencia nganing pakusogon an programa sa agricultura kan gobierno.


Nganing dagos-dagos an serbisyo magkakaigwa nin generator set kun magkaigua nin brownout sa Casureco II.

Comments


bottom of page