top of page

Bakong si Gadon an Solusyon



“God help us.” “What?” “Onli in da Pilipins.” “Seryoso ba si BBM sa poverty alleviation?” “What’s happening to our country?” “Ano ba yan?” “Dios ko po.”


Ini an iba sa mga manlain-lain na reaksyon kan mga Pilipino na nabasa ko sa Facebook kan inanunsyo kan gobyerno ni Presidente Bongbong Marcos (BBM) na si Lorenzo “Larry” Gadon, an suspindidong abogado, an bagong Presidential Adviser for Poverty Alleviation.


Ano ta negatibo an kadaklan na reaksyon kan mga tawo ki Gadon? Siisay baga si Gadon?


Si Gadon numero unong suporter ni BBM, Pastor Apollo Quiboloy asin kan dating presidente na si Digong Duterte. Konserbatibo an kaisipan nya asin bistadong red-tagger saka anti-communist. Kontrobersyal an pagkatao ni Gadon dara kan saiyang mga posisyon sa mga sosyal asin politikal na mga isyus na resulta kan kakulangan nin kritikal na pagiisip.


Kunpirmadong bastos si Gadon. Kan 2018, inapud nyang “bobo” an mga suporters o kabuwan kan dating Chief Justice Lourdes Sereno; bako lang yan, pig “dirty finger” nya pa si mga tawo na nahiling kan publiko an video sa sosyal midya.


Si Gadon an promotor na ipa-impeach si Supreme Court Associate Justice Marvic Leonen kan Disyembre 2020 na mayong basihan. Marhay na lang ta initsapwera an kaso.


Kan Enero 2022, sinuspindi si Gadon kan Korte Suprema ta minuda nya an periodistang si Raissa Robles sa lengguaheng pano nin kabastosan.


Kaya kan si Gadon an napili ni BBM na Presidential Adviser for Poverty Alleviation siyempre negatibo an reaksyon kan kadaklan sa mga tawo.


Dai ko ikinangalas na tinawan pwesto sa gobyerno si Gadon. Kun baga sa basketball, saro sya sa mga tirador kan Team Duterte saka kan Team Marcos. Dirty player sya, kun baga. Gigibuhon nya an ano man na kahambugan o atake sa mga tawong kontra sa Team Duterte o Team Marcos. Mayo syang iginagalang. Garo sya pison na maski siisay liligison kun kaipohan.


Sa klase kan politika sa Pilipinas, nagagamit si Gadon kan mga politiko. Biruon mo saro sya sa mga nagin “attack dog” kan Team Marcos kan nakaaging eleksyon.


Kaya dai na kita mag-ngalas kun ano ta tinawan syang importanteng posisyon sa gobyerno na iyo an magresolba sa problema kan kapobrehan (poverty) sa Pilipinas. Natural sa mga politiko sa Pilipinas na tawan nin posisyon sa gobyerno an saindang mga kabuwan. “Payback time” an apud kaini.


An ikinangangalas ko, iyo ini: Kun seryoso si BBM sa pagresolbar kan problema kan kapobrehan, ano ta si Gadon an napili nya na mayong eksperiensya? May pagka-bastos pa.


Kun seryoso si BBM, dapat an pig-appoint nya sarong tawo na kwalipikado, sarong tawo na bakong bastos, sarong tawo na may GMRC (Good Manners and Right Conduct), sarong tawo na tataong makipag-kapuwa tawo lalo na sa mga indibidwal o grupo na iba an perspektiba.


Grabe an problema kan nasyon pagabot sa kapobrehan, tapos an napili pa ni BBM iyo si Gadon na dai iginagalang kan mga namamanwaan.


Mientras na sinusurat ko an artikulong ini, may nagluwas na kasuratan hali sa Information Office kan Korte Suprema na may petsang Hunyo 28, 2023. An headline iyo an minasunod: Court Unanimously Disbars Atty. Lorenzo “Larry” Gadon for Misogynistic, Sexist, Abusive and Repeated Intemperate Language.


Dara kan baretang ini, sana bawion ni BBM an appointment ni Gadon. Pero kun dai, pano mareresolbaran ni Gadon an kapobrehan kun basa ng marhay an reputasyon nya sa mata kan publiko?


Sa interbyu ni Gadon sa ANC matapos syang madisbar, mayo daa syang dapat hagadan nin dispensasyon. Piglibak nya pa an Korte Suprema, inatake si Chel Diokno saka si Leila de Lima na mayo man ginibo sa iya, pig red-tag an Gabriela, asin dinepende nya an sadiri nya na mayo daang koneksyon an bago nyang posisyon sa pagka-disbar sa iya. An gusto nyang sabihon, pwede pa syang magin epektibong Presidential Adviser for Poverty Alleviation maski bako na syang abogado.


Talagang ibang klase si Gadon. Garo ipinangaki sa ibang planeta. Bako lang na mayong supog, dai pang ugali. Kun may natatada pang delikadesa si Gadon, kun talagang importante sa iya an maresolbaran an problema kan kapobrehan, an pinakamarhay nyang pwedeng gibuhon iyo an dai paghako sa bago nyang posisyon.


Si BBM naman, kun talagang seryoso sya sa pagresolbar kan kapobrehan, magpahiling syang determinasyon, kusog nin buot asin pagka-totoo sa saiyang mga desisyon.


Sa katapusan, kun may gusto akong sabihon, bakong si Gadon an solusyon.


bottom of page