Baldemoro, bagong matukaw na City Administrator kan Naga

Si Consejal Elmer S. Baldemoro, paluwason na consejal kan 13th Sangguniang Panlungsod magpapadagos an serbisyo sa gobierno lokal kan Ciudad nin Naga bilang City Administrator, sa ika-duwang termino ni re-elected Mayor Nelson Legacion.


Pataposon na sa ika-tolong termino an consejal sa Hunyo 30, 2022, siya an campaign manager kan Team Naga na liwat nangyari an ubos-kun ubos, gabos-kun gabos sa nagtapos na eleksyon lokal.


Si Baldemoro, tinitiwalaan kan jefe ejecutivo kan saiyang kakayahan nganing nombrahan komo City Administrator karibay ni Frank Mendoza na concurrent sa puesto asin nagtutukaw na Budget Officer.


Siya iyo an responsable bilang padreno sa mga ordinansa kan Revised Comprehensive Children’s Code of Naga City Children’s; Persons with Disability Code of Naga City; Solo Parent Code; na nakapalaman sa sinambit na ordinansa an programa asin mga benipisyo; Brgy. Volunteers Retirement Ordinance; Brgy. Empowerment Ordinance of Naga City; asin Tabang-Tugang Program (Covid-19 Response), kabale na an ordinansa nganing magpatindog kan monumento ni Gat Andres Bonificio na nakatalaan ibugtak sa barangay Balatas.


Sa ngunian siya an Chairman kan Committee on Persons with Disabilities saka Committee on Rules and Privileges sa 13th SP.


Nagpuon siya sa SK Kagawad, naging Barangay Secretary, sagcod Punong Barangay kan Concepcion Grande pasiring sa City Councilor asin sagcod sa ngunian nagpapadagos pa sa serbisyo sa gobierno sa laog na nin 30 anyos.


Nagserbe bilang secretary kan Philippine Councilors League puon pa kan 2016; activong miembro kan National Movement of Young legislator; asin presidente kan Triskelion Alumni Organization-Naga City puon pa kan 2018.


Komo naka-tolong termino nagrecibe nin recognition award sa ginibong PCL Convention sa Manila kan Hunyo 22, 2022 mantang kabale sa nagrecibe kan kaparejong onra sinda Consejales Mila Raquid-Arroyo asin Gregorio Abonal. (DPAureus)