top of page

BALLOON SA PANGANURON



Tigsik ko po ining kagadanan

Kun nag-abot na an saimong kaaldawan

Dae mo na nanggad madudulagan

Magtago ka man sa lusbot ni Nanay!


Tigsik ko an sanggot ni Kamatayan

Kada aldaw rinibo an ginagadan

Bakong sa tarom napupugotan

Kundi sa tetanus minaalimpasay!


Tigsik ko an daga sa kinaban

Pirang ektarya dae ka magkamkam

Kun oras na kan saimong kagadanan

Sadit na pidaso an saimong lulubngan!


Tigsik ko an barabason na si San Pedro

Sa gabos na santo, amigohon mo

Suholan mong lalong, Texas na puro

Deretso ka duman sa Paraiso!


Tigsik ko po an kapeng barako

Sobra an pagkamoot sa saimo

Aga, odto, banggi nasa lamay mo

Pighahalat ka po sa pagbangon mo!


Tigsik ko an mas oragon na balloon

Ihahatod ka hasta sa panganuron

An lupad marikas, halangkawon

Mientras na nakahuyom ka sa kabaong!

Comments


bottom of page