Banchetto de San Jose tampok liwat sa Kapaskohan

Ni Sonny Malate

San Jose, Camarines Sur --- Liwat na  macolor, maogma asin bibo an celebrasyon kan Kapaskohan digdi. Ini nin huli ta apwera kan pagkakaigua nin  ilaw-ilaw,  yaon man liwat an Banchetto de San Jose. 

An Banchetto o night market asin ilaw-ilaw piglatag kan local government unit (LGU) sa liderato ni Alkalde Jerold B. Peña para sa dagdag na kaogmahan sa Pasko,  pagbusol kan local na turismo, dagdag na revenue generation  asin padagos na suporta sa mga saradit na entrepreneur sa localidad.

An Banchetto asin an ilaw-ilaw sa Pasko magkasabay na binukasan sa publico kan Deciembre 12 asin matatapos sa Enero 6, sunod na taon. An ilaw-ilaw nasa atubangan kan municipal government  building mantang an Banchetto yaon sa kalyeng harani digdi.

An lights-on ceremony dinagsa nin mahibog na katawohan na sobra an kaogmahan sa snow effect na ibinagay sa tema kan pailaw ngonian na taon. An pirang minutos na fireworks display sa kaitaasan  nagcompleto kan macolor, magayagaya  asin  maliwanag  na eksena.

Sa post ni Peña sa saiyang Facebook account, piglinaw niya na an gastos sa ilaw-ilaw hale sa sadiring bulsa niya asin saiyang esposa na si Ma'am Ying. Ini bilang kasimbagan niya sa nagluwas na rimongrimong kan nagkakapirang individual dapit kaini.

An Banchetto nagpoon sa banwaan na ini kan Pasko kan 2022 sa initiativo kan San Jose Partido Chamber of Commerce and Industries asin LGU. Kan Febrero ngonian na taon, ini  piglatag man sa Harana Festival.  An conceptong ini an nakalakop na sa mga pagtaraid na banwaan sa Partido Area.

Susog ki Angela Nicole R.  Carrido, Municipal Tourism Operations Officer I,  nasa 32 na mga entrepreneurs gikan digdi asin pagtaraid na banwaan an kabarale sa Banchetto ngonian na taon. An kada booth may registration fee na Dos Mil (Php2k) Pisos  sa bilog na periodo  asin plasadang Beinte (Php20.00) Pisos kada aldaw.

Dagdag na tampok sa Banchetto iyo an magayon na musica asin dadalanon pangcultura sa paagi kan San Jose Partido Serenata saka local talents asin San Jose Partido Performing Arts Group. Sa paagi kaini, an Banchetto nagiging bibong  taragboan bako sana sa comercio kundi pati na sa local na cultura.

Mientrastanto, sa sustenidong pagmawot ni Peña na maparambong an saradit na negocio, binukasan na an Negosyo Center digdi. Ini sa paagi kan Business Permit  and Licensing Office (BPLO), sa  pakikipagtabangan kan  Department of Trade and Industry (DTI) sa pamamayo ni Jay Percival S. Ablan.

Sa ngonian, si Rhea De Alday, DTI Business Counselor, an nakatuka digdi duwang veces kada semana. An DTI asin BPLO sa paagi ni Tirso P. Delfino an nagtatarabangan para sa kapakanan kan mga saradit na negociantes digdi..

Pigbuyagyag man ni Carrido na an LGU oficialmente nang nagpili kan Biko sa irarom kan "One Town, One Product" (OTOP) kaini. An biko sarong manamit  na karokanon gikan sa pulutan o malagkit na bagas na orgulyong producto digdi.

Ini an ginigibong souvenir product kan LGU  para sa mga bisita na presente sa mga significanteng pagtiripon digdi. Arog kan binanban, puto tabla, cocoa asin ampaw na makukua sa Partido Area,  ini an midbid asin nakalakop na sa ibang lugar.

Sa asistencia kan Department of Science and Technology (DOST), gigibohan nin sistema na  mapreservar ini nin pirang semana tanganing orug pang  makaabot sa ibang lugar kairiba na sa ibang nacion.

Katuwang kan LGU sa pagmantenir kan katrangkilohan asin kalinigan sa Banchetto pati sa ilaw-ilaw  iyo an MENRO, MDRRMO, BFP asin PNP.

Banchetto de San Jose tampok ngonian na Pasko. (Photo - Let's Go Partido)