Bautismo nin kalayo sa politika

Ngonyan matuga na ako kan mga tama asin talang ko sa politika.

Pagpoon ko kan dekada 80 an botante kadto kun bakong manang, maning--- maning 50 o manang 100. Ngonyan an sarong ribo dae ka pa nakakasiguro o garo ka man lang nagtaya 1000 sa sugal na pig-aapod politika na daeng kasiguruhan.

Mawalat kang tig-sangribo sa kada botante sa kada pamilya na dae man sigurado kun maboto saimo o dae.

Nagtatrabaho pa ako sa Bicol River Basin Development Program (BRBDP) kan pagluwas ko sa opisina pighahalat na ako ni Vice Governador Jose Velarde na dadarahon niya ako ki Assemblyman Noli Fuentebella nganing besdisyunan ako bilang masunod na alkalde kan Milaor. Kundi pag-abot mi sa harong ni Noli sa barangay Abella sabi sako natugaan niya na si Roger Flores kaya pigsayumahan niya ako.

Kaya dinara ako sa harong ni Titoy Villafuerte sa barangay Sabang, Naga City. Segun ki Titoy na tugang na matua ni

Minister/Assemblyman Luis R. Villafuerte. Ako an gusto kan magtugang ta si Flores daa mas dukot ki Mayor Jaime Avengoza kan Sipocot na kalaban ninda sa politika.

Kan bangguing idto pagpuli ko sa harong, pigkaulay ako ni panugangan, ex-Mayor Sever Antonio na ako an mamanokon kan partidong Bikol Saro. Dapat daa ako na ta an sabi kan saiyang padihon na si Governor Felix Alfelor Sr. mas popular daa ako kesa saiya ta sa Iriga mas bistado pa ako.

Pig-prangka ko si Papa na kun ako makandidato sa lindong kan KBL o Kilusang Bagong Lipunan ta si Eddie Alanis ngani kan magkandidatong assemblyman kan 1978 gana na pero daog pa ta bakong KBL.

An KBL an partido ni Presidente Ferdinand Marcos kaidto.

Nag-urulay an mga gurangan na politiko sa Milaor asin nagkasundo na si Flores an alkalde ako an bise-alkalde ta mas joven pa man daa ako. An guinibong areglo ni Minister LRV na huli ta anom na taon an turno kaidto nin sarong alkalde tolong taon matukaw si Flores, tolong taon man ako.

Nagpirirmahan kami ni Flores para alkalde, Verdadero para Bise-alkalde asin si Luis Villafuerte bilang testigo.

Kan magpoon na an karampanyahan ngalas ako ta mayong kuarta an KBL. An KBL pigbabansagan kan mga tao na Kasal, Bonyag, Lubong ta gulping kuarta pero kami lugod mayo.

Idto palan an sakuyang alkalde nag-organisar nin sarong partido na pig-aapod na Independent Party, siya an alkalde pero an Bise si Norberto Flores, kaparehong apelyedo kaya an bansag placis-placis.

Tig-apat kaming konsehales na kandidato, an apat perming kaiba ko pero itong apat sa linya ni Flores kairiba kan Independent Party. Idto palan an gustong paganahon si kalaban ko sa pagka-Bise ta kun ako an manggana mapipiritan si Flores na magbaba sa pwesto asin patukawon ako bilang alkalde pakalihis nin tolong taon. Idto an pig-aapod na bautismo nin kalayo sa linya nin politika ta si mga kairibanan ko iyo man sana an makakalaban ko asin idtong Mayor ni Alfelor sa Milaor sa linya kan Bikol Saro na si Angel Jaucian ako an pigdadara para Bise-Alkalde.

Naglibot kami sa 20ng barangay kan banwaan na suruwayan pagnagpa-miting si Mayor Flores dae ako kaibanan, kun ako magpa-miting dae ko man siya kaibanan.

Nagkakasarabatan kami na dae nagtitirinuhan. Garo bakong magkaiba sa partido. May mga lideres si Flores na hayag-hayagan an kampanya kontra sakuya. Sa parte ko man an kampanya ko pabor para ki Angel Jaucian na kalaban niya maski sinda magpartidaryo.

Mayo lamang naghuhuna na magana ako para Bise-Alkalde ta si Flores asin an saiyang mga alipores kontra sakuya, pabor duman sa kalaban ko na si Norberto Flores.

Palibhasa ako taga-radyo ako an pinaburan kan mga taga-media sa mga broadcast asin sa peryodiko lokal. Nanggana si Flores para alkalde, gana man ako para Bise-Alkalde. Nagbaralinghaw gabos si mga kalaban ko magpoon sa Mayor asin mga konsehales, pigtatarabuga ako sa luwas kan DZGE pero dae man makaralaog ta kakampi ko an management kan Filipinas Broadcasting Network.

Pag-eleksyon kan opisyales kan Vice-Mayors League of Camarines Sur ako an napiling presidente na mayong kalaban, na may apat na Bise-presidente hale sa apat na distrito kaidto. Si Vice-Mayor Larry Basmayor kan Minalabac iyo an sakuyang secretary general.

Trangkelo si iribanan mi ni Mayor Flores na sakong kumpadre sagkod mag-abot an EDSA Revolution kan amay na parte kan 1986. Nagtukaw ako bilang alkalde ta siya nag-demitir sa pwesto alagad nakaresibe kan gabos na beneficio.

Talagang an Diyos suripot, an tao kuripot.

Abangan an masunod na kabanata.