BAWAL NA MAG-AGI SA NATIONAL ROAD: P5k multa sa mga masinutil na e-vehicle users poon sa Enero 2

Nagpatanid an Naga City Bicycle Board sa pamamayo ni Boboy Hernandez na iguang penalidad na P5,000 sa mga e-bike asin e-trike users na masinutil na bawal na sinda mag-agi sa mga national road.

Igua nang preparadong impounding area an Land Transportation Office (LTO) sa LCC compound, Ciudad nin Naga nganing digdi darahon an mga makukumfiscar na mga e-vehicles kasunod kan saindang pagsinutil sa directiva kan LTO central office na bawal na sinda sa mga national road poon sa Enero 2, 2026.

An LTO padagos kan saindang information drive sa publico na tinatawan sinda nin talaan hasta sa Enero 2 sa sunod na taon na digdi na ma-estrikdo an ahencia sa pagdakop sa mga pasaway na tsuper kan e-vehicles.

Dai palang nahahaloy an Committee on Public Transportation sa Sangguniang Panlungsod kan Ciudad nin Naga na pinamamayohan ni Consejal Omar Buenafe nagpaapod nin public hearing na inatendiran kan opisyales kan mga organisasyon kan e-vehicles nganing ipaliwanag an katuyohan asin mga reglamento na dapat sunodon poon sa Enero 2, 2026.

Saindang pigpatanid na magiging estrikto na an ciudad na dapat rehistrado sa City Hall an mga e-vehicles mantang si hale sa ibang banwaan dapat rehistrado sa saindang LTO. Laen pa kaini, dapat magkua sinda nin licensiya sa pagmaniho.

Sa sinambit na tiripon pigpaluwas ni LTO Chief Glenn Mancera kan Naga an mga lugar kan national road na prohibido mag-agi an e-bike asin e-trike users. Ini kinababalihan kan Maharlika Highway poon sa linderos kan Naga asin Pili pasiring sa Almeda Highway, poon sa Roxas Boulevard pasiring sa Robinson Place sundo sa LBP sa may Rotonda, poon sa Diversion Road sundo sa Almeda Highway sundo sa Jolibee Almeda Highway pasiring sa Barangay Concepcion Grande, Robinson place hasta sa linderos kan Naga asin Milaor, Camarines Sur.

Magiging katuwang kan LTO enforcers iyo an deputize na traffic officers kan Naga City Police Office sa pagponpon kan mga e-vehicles na dai masunod sa directiva kan ahencia.

An iba pang mga lugar kan national road na dapat dai agihan pwedeng maghapot sa LTO asin sa opisina ni Boboy Hernandez sa City Hall.

E-Trike asin e-bikes users sa Ciudad nin Naga amay nang nagsusunod sa patanid kan LTO na bawal sa national road.