BAYAN dai tiwala sa hiro kan congreso sa Cha-cha

An Bagong Alyansang Makabayan (BAYAN) sa Bicol dai tiwala sa pigtutulod na Charter Change kan congreso na dapat enmiendahan an economic provisions envez gibohon nang 100 por ciento an foreign ownership sa mga public utilities tanganing maenganyar an dayuhan na negosyante alagad igwang hararum na suksok

Sa pinaluwas na press statement kan BAYAN nagtutubod sinda na saro sa plano iyo an pairarum na palawigon an limit extension kan mga elehidong opisyales.

Sa ngunian lusot na sa Committee on Constitutional Amendment sa duwang camara an haloy nang plano na dapat madagos nang maenmiendahan an 1987 constitution.

Duda pa sa mga pahayag ni Presidente Ferdinand Marcos Jr. na bako niyang prioridad an charter change alagad mayo man siyang aksyon tanganing igilid kan congreso na maenmiendahan an 1987 constitution.

Nagkapera nang mga congresista an nagpahayag na dai maiibitaran na isingit an isyu sa planong term extension kan mga elihidong opisyal.

Sa ngunian nag-aatubang sa halangkaw na inflation an Filipinas alagad an nasa mayoriang congresista maging sa senado an nasisibot sa Cha-cha.

An pagpili asin pitong bulan na trabajo kan mga delegado sa constitutional convention maabot sa P18 bilyones an gagastoson apesar dai pa ngani nakakahawas sa krisis sa economia huli kan pandemya.

Sa mga diputado sa rehiyon Bicol an naglangtad kontra sa Cha-cha huli ta dai pa napapanahon iyo sana sinda si Camarines Sur 3rd District Congressman Gabriel H. Bordado asin Albay 1st District Congressman Edcel Lagman.

An iba man na sektor nagpahayag na dapat tawan prioridad kan administrasyon Marcos asin congreso iyo an paglaban sa kurapsyon bako sanang sa personal interes ninda. Bilyones peso an hinahabon na fondo kan gobierno alagad milyones na mga Filipino an mga nagtitios.

Sinabi pa kan BAYAN na saindang tinatawan an importanteng nangyari sa EDSA uno iyo an 1987 Philippine constitution na nagtataong halaga sa mga probisyong pang nasyon na demokraticong interes siring kan Bill of Rights asin deretso pangtao, limitasyon sa mga dayuhan para sa 40 por cientong kapital, anti-dynasty sa politica, asin paghaklas kan mga dayuhan tropa militar.

Alagad dai ini natawan prioridad kan mga nakaaging administrasyon, kabali pa an isyu bugos na agrarian reform asin dakul pang iba.

Mientras tanto, si Congresista LRay Villafuerte kan segundo distrito kan Camarines Sur nagpahayag mientras na nag-aatubang an nasyon sa problema sa pagtios, kinakaipuhan magcrear nin trabajo nganing dakul na mga Filipino an igwang hanap buhay, asin kaipuhan an foreign investments, foreign capital asin digdi siya nagpapabor sa charter change. (dpa)