‘‘Bayanihan’’ binuhay kan LGU

Bato, Catanduanes --- Sa paagi kan ‘‘Bayanihan’’ nagtatarabangan an mga familia sa banwaan na ini nganing mapatindog an maabot sa 5,171 mga totally asin partially damaged kan kaharongan na pinalakma kan super typhoon Rolly asin Ulysses.

Igwa sindang katuwang hale sa fuersa kan lokal na gobierno sa paagi kan mga empleado kan Engineering Department, Solid Waste Management Office, Traffic Enforcer asin volunteers.

Ini an mga pahayag ni Alcalde Juan Rodulfo kan LGU Bato mantang an saindang banwaan enterong piglaila kan duwang makukusog na bagyo asin digdi enot na nag-land fall na kaipuhan an cooperasyon kan lambang namamanuan huli ta sinda gabos biktima kan calamidad.

RELIEF OPERATIONS SA BATO, CATANDUANES. Retrato sa taas, truck na naghakot kan mga relief goods na dara kan KBP Camarines asin Bangon Bato Catanduanes Advocates mantang sa babang retrato grupo kan mga residente na naghahalat kan mga ayuda hali sa Camarines Sur. (Retrato kua ni Elvira Evangelista)

An desisyon ni Alcalde Rodulfo na kaipuhan an bayanihan kan publico mantang haros gabos na familia sa saindang banwaan apektado kan pagragasa kan calamidad asin nganing maparikas an pagbangon kan banwaan.

Sa listahan kan Municipal Disaster Risk Reduction Management Office (MDRRMO) igwang totally damaged na 2,223 na harong asin 2,848 mga partially damaged na harong.

An LGU saro sanang 5th class municipality na may 27 barangay asin harani sa dagat an saindang banwaan namay 21,860 na populasyon nagdedepende sana sa 80 milyon na Internal Revenue Allotment (IRA) asin kulang na marhay an saindang calamity fund nganing itustos na tabang sa mga biktima kan calamidad, sabi pa ni Rodulfo.

An abaca plantation na igwang danyos na P45-M na iyo an pig-aasahan kan saindang paraoma haros inubos nin destroso asin taon an bibilangan nganing makakabangon sa produksyon.

Sa infrastractura na igwang P30-M na danyos na haros enterong barangay apektado alagad marhay ngani ta zero casualty mantang amay estrictong na-implementar kan LGU an pre-empted evacuation kan mga residente.

Haros 90 por ciento an laila kan danyos sa mga poste asin linya kan First Catanduanes Electric Cooperative (Ficelco) mala ngani sa 27 barangay an napapabulosan pa sana nin suplay kan kuryente iyo an barangay Marinawa. (DPAureus)