BBB program ni Duterte sa Bicol ipapadagos ni BBM, sabi

Naglalaom si Undersecretary Marvel Clavecilla kan Presidential Assistant for Bicol Affairs (OPABA) na ipapadagos kan bagong matukaw na presumptive President Ferdinand Marcos Jr. na ipapadagos an Build-Build-Build (BBB) program sa Bicol kan paluwason na Presidente Rodrigo Duterte.

Sa kampanya ni BBM saro sa saiyang pangako digdi sa Bicol iyo an pagpadagos sa modernisasyon kan Philippine National Railways (PNR) asin an QueBex na parejong igwa nang bilyones peso na alokasyon. Iyan saiyang pangako kan panahon nin eleksyon, sabi ni Clavecilla.

Alagad an OPABA na saiyang pinamamayohan magdedepende sa bagong administrasyon kun ipapadagos.

Si Clavecilla nagpahayag pa na antes kan Hunyo 30, 2022 masumiter siya nin courtesy resignation huli ta co-termino siya ni Duterte na matatapos na an anom na taon sa Malacañan sa Hunyo 30.

An expressway igwa nang fondo sa Department of Public Works and Highways saka an modernisasyon kan perrokaril yaon sa Department of Transportation an fondo.

Sa record kan DPWH an gobierno nag-alokar nin Php700 bilyon para sa konstruksyon kan 220 kilometros na QueBex na bagong ruta asin mapalipot kan oras nin viaje Bicol-Manila.

An mga banwaan na aagihan base sa DPWH iyo an mga minasunod: Pagbilao, Padre Burgos, Gumaca, Lopez, Calauag asin Tagkawayan, gabos sa provincia nin Quezon. Digdi sa Camarines Sur maagi sa Lupi, Sipocot, Pamplona asin San Fernando.

Sa lado kan PNR igwang Php142-bilyon na contrata sa joint venture kan China Group Ltd. China Railway No. 3 Engineering Consulting Group. Ltd mientras na an proyekto sa enot na 380 kilometros.

An proyekto sa perrokaril enot nang pinangako na tataposon sa laog kan termino ni Duterte alagad sa ngunian sagcod pa sana sa survey sa posibleng mga re-routing nganing deretso an dalagan kan train.

An PNR Bicol igwang laba nin 565-kilometer railway na masumpay Metro Manila abot sa Southern Luzon provinces sundo sa Sorsogon asin kabale an Batangas.

Alagad an ibang sektor duda sa pangako ni BBM mientras na an rehiyon Bicol dinaog siya digdi ni VP Leni Robredo sa nagtapos na eleksyon. (dpa)

PNR Station sa Ciudad nin Naga naghahalat sana kun nuarin masikad an pigsasabing modernisasyon kan perrokaril. (dpa)