BCS nakakabawi na sa pagkalugi

Nakakabangon na sa paglakma sa ingreso an Bicol Central Station (BCS) sa Ciudad nin Naga huli kan pandemya mantang perang bulan paralisado an mga viaje kan pampasajerong bus alagad sa ngunian inaabot na kan manijamiento an dos milyon pesos na income o cincuenta por ciento.


Kan mayo pang pandemya inaabot nin cuatro milyon pesos an saindang income cada bulan kabale na an koleksyon sa mga stall owners, sabi ni operation manager Nonoy Reforsado.


Afuera pa kaini, an bayad kan mga stall owners ginibo na munang cincuenta por ciento kan saindang dating arkila cada bulan bilang konsiderasyon ngunian na panahon nin pandemya huli ta kulang pa an mga parokyano.


Sinabi pa ni Reforsado nagkaigwa sana nin income an bus terminal kan tugotan na kan Land Transportation Franchising and Regulatory Board (LTFRB) an viaje sa inter-provincial route.


An mga natawan sana nin special permit kan LTFRB iyo an Raymund bus company, Peñafrancia tours and travel company asin BLTB.


An BCS naghahalat sana kan direktiva kan IATF asin LTFRB kun nuarin ibubuelta an inter-regional route.


An City Hall saro sa saindang pig-uurgolyo kan mabawi an operasyon kan bus terminal hale sa pribadong negosyante mantang milyones pesos an saindang ingreso cada bulan.


Alagad na-apektaran an koleksyon huli kan pandemya mantang luway-luway nang nakakabangon sa presenteng manijamiento ni Reforsado.


Bako lang income sa operasyon kan bus terminal envez maging an pagbugtak digdi nin hotel para sa mga pasajeros alagad kabale man ini sa apektado kan pandemya.