BECA mapadara nin mga lineman sa Visayas

An Bicol Electric Cooperative Association (BECA) nagpadara kan saindang grupo nin mga lineman na inapod na Task Force Kapatid na naglarga kan Lunes, Deciembre 27, nganing magtabang sa pagbangon kan mga lakma nang mga linya asin poste kan mga cooperativa nin electricidad sa rehiyon kan Visayas na piglaila kan Super typhoon Odette.


An BECA kumpuesto nin onseng cooperativa nin electricidad sa anom na provincia kan Kabikolan, an saindang sarong organisasyon pakatapos tolos kan paglamasa nin calamidad sa Visayas nag-urulay nganing magpadara nin augmentation kan mga lineman asin igwa nang naglarga kan Deciembre 27 mantang si iba naglamag ngunian na semana.


Si Rinner Bucay, opisyal na parataram kan Camarines Sur II Electric Cooperative (Casureco II) kabale sa Task Force Kapatid an saindang grupo dara an boom truck asin sarong utility truck kaibanan an mga lineman na kumpleto nin mga kagamitan sa pagsulit kan mga linya asin poste.


An gabos na gastos kabale na sa gasoline papasanon na kan cooperativa na mapadara kan saindang personajes asin dai na maasa sa cooperativa nin electricidad na apektado kan nakaaging calamidad.


An saindang organisasyon nin mga cooperativa nin electricidad bako lang sa Bicol envez sa enterong Filipinas igwa nang kasundoan na ano man na panga-ngaipo sa rehabilitasyon na inagihan nin calamidad nasadiri nang iniativo nganing magtabang.

Grupo kan Task Force Kapatid kan Casureco II madedestino sa provincia nin Bohol sa laog nin sarong bulan nganing magtabang mapabangon an mga linya asin poste nin kuryente na apektado kan paglaila kan super typhoon ‘‘Odette’’.


An mga lineman hale digdi sa Bicol huli kan ‘‘call of duty’’ sa sainda nang destinong cooperativa nin electricidad masabat nin bagong taon bako na muna sa saindang familia asin pigtawan nin prioridad na ma-ayudahan an biktima nin calamidad na sagcod sa ngunian mayo pa nin suplay nin kuryente.


An grupo kan lineman hale digdi sa Bicol sa rehiyon Visayas na muna ma-estar sa laog nin sarong bulan defende kun sain sinda madedestino.


Kabale sa mga lugar na inagihan kan calamidad iyo an Negros Oriental asin Negros Occidental na kun haen digdi nag-landfall si bagyo kan Deciembre 17. An Siargao, Bohol, Cebu, Leyte asin iba pang provincias sa Visayas.


An ibang rehiyon nagpadara man kan saindang augmentation nganing maparikas an rehabilitasyon kan mga linya asin poste sagcod na maibalik an suplay kan kuryente.


Ini kasimbagan sa pangapudan kan Department of Energy na magtarabangan mapabangon tolos an suplay kan kuryente sa mga apektado kan calamidad.


PHILRECA KINUNDENAR


Mientras tanto, an National Electrification Administration asin Alliance of Dissatisfied Consumers Movement (NEA – ADCOM CUCA INC) saindang kinukundenar an Philreca Party list huli ta ginagamit sa politica an Task Force Kapatid kan NEA na nacrear ni dating administrator Fr. Francisco Silva kan 2002.


Kinumfirmar ni Eric Bucoy, Presidente kan ADCOM na sinda an nasa likod kan pig-post sa social media na kinukundenar an Philreca sa padagos na paggamit sa politica kan task force na nagtatabang na mga cooperativa nin electricidad sa ‘‘restoration’’ kan suplay nin kuryente sa mga provincia na piglaila kan super typhoon Odette sa rehiyon kan Visayas.


An Task Force Kapatid ‘‘legacy’’ yan ni Fr. Silva bako kan sinambit na party list asin iba pa nindang pag iriba ninda sa partido, sabi pa ni Bucoy.


Alagad an parataram kan Casureco II, Bucay nagpaliwanag na an Philreca iyo an nagtatabang nganing maghiro an mga cooperativa nin electricidad sa nasyon para magtabang sa restoration kan suplay nin kuryente sa mga provincia na apektado kan nakaaging calamidad.


Normal yan sa politica kun igwang mga tuyaw, sabi pa ni Bucay. (dpa)