Besperas nin Pasko naggabat si trafico sa Andaya Highway

Naggabat si bulos kan trafico sa besperas kan Pasko sa Andaya Highway sa Lupi, Camarines Sur huli kan paghuros kan daga sa irarum kan koncretong tinampo asin riprap sa Barangay Bulawan Sr. na padagos tinatambakan nin daga kan DPWH mantang sa enotan na Brgy Cabatugan iguang patrabajo an kaparejong ahencia.

Nagtutubod an obras publica na pakatapos kan holiday season magian an bulos kan trafico asin magpadagos kan saindang patrabaho sa highway.

Alagad igua nang ginibong solusyon an DPWH Bicol sa pagtarabangan kan mga engineering districts nagbukas na nin tolong sections para sa two-way traffic asin an natatadang tinampo binukasan na sa trafico.

Sa Maharlika Highway sa Labo, Camarines Norte, binukasan na an one-way traffic.

Kan mayo pang ginigibong aksyon an DPWH Bicol grabe si tuyaw kan publico sa sinambit na ahencia alagad nagtarabang na sa pagmantenir nin bulos sa trafico an kapupulisan asin Land Transportation Office Bicol nag-gian si bulos trafico.

Nagkakaigua pang problema sa trafico kun iguang pasaway na tsuper na-counter flow asin napundo ini kan sunod-sunod si ginibong pantitiket kan LTO sa mga pasaway na tsuper.

Inaabot nin 18 hasta 20 oras si viaje hale sa Lupi hasta sa Manila kan mayo pa naghihiro an mga ahencia de gobierno.

Antes kan Pasko si Police General Rommel Francisco Marbil, jefe kan PNP sa nasyon nagbisita sa lugar kan Andaya Highway kaibanan si BGen Andre Dizon, regional director kan PNP Bicol.

Naghuhuros naman an mga tinambak na daga kan Deciembre 25 sa dating nagbagsak na daga sa irarum kan kumpletong tinampo asin riprap sa Andaya Highway sakop kan Lupi, Camarines Sur huli kan pagpara uran dara kan shearline.

(Retrato: Katambay Bicol)