BFP Bicol mapadara pa nin dugang na firetruck sa CSur

Nagcierto an Bureau of Fire Protection (BFP) sa Bicol na mapadara pa nin dugang na mga fire truck sa Camarines Sur nganing makumpleto an mga municipalidad digdi na magkaigwa nin sadiring fire truck.

Ini an mga pahayag ni Regional Director Chief Supt. Ricardo Perdigon kan BFP Bicol matapos kan saindang ginibong turn over ceremony kan Hulyo 8, 2022 sa BFP Buhi asin Baao kan Rinconada district.

Tigsarong brand new kan Hino fire truck an duwang fire station na presente an mga opisyales lokal sa ginibong simpleng seremonya.

Sinabi pa ni Perdigon na an duwang banwaan kan Sagñay asin Presentation parejong sa Partido area iyo an masunod na marecibe nin bagong fire truck.

Sa pulicia kan BFP Central Office an lokal na gobierno iyo an bahala sa pagdonar sa sainda kan lote na tutokdokan kan Municipal Fire Station mantang an ahencia iyo an matao kan fire truck.

Prioridad kan ahencia na magkaigwa nin sadiring Fire Station an lambang LGU sa tahaw kan paglangkaw kan caso nin mga insidente nin kasulo.

Sa magkasuhay na Blessing and Turnover Program, pigrecibe ni Municipal Fire Marshal SFO4 Jose Lee Jr na presente sinda Alcalde Rey Lacoste asin kan mga opisyales lokal, DILG MLGOO Elena Oliva, BFP regional director Perdigon, Camarines Sur Provincial Director Supt. Emmanuel Ricarfort, Deputy PFD SINSP Joseph Catimbang asin Deputy Chief of Police PCT Dennis Barrameda. Sa Baao, CSur an kaparejong opisyales kan BFP CSur asin Bicol an presente asin opisyales lokal. (dpa)