BIA magiging operational ngunian na taon - DOTr

Liwat naman nagpangako sa mga Bicolano an Department of Transportation (DOTr) na magiging operational an Bicol International Airport (BIA) antes matapos an presenteng taon kasunod kan saindang ginibong inspeksyon sa proyekto kan nakaaging Juevez, May 13.

Si ika-duwang pangako kan DOTr tataposon sa Septiembre 2021 alagad sa pinakahuring pagbisita kan opisyales kan DOTr sa pangenot ni Secretary Arthur Tugade nag-aasegurar na patapuson na an proyekto asin magiging operational antes matapos an taon 2021.

Sa entrevista kan Bicol Mail ki dating Juez asin Presidential Adviser for Bicol Affairs, Marvel Clavecilla nagdududa siya na mapalyar naman an pangako kan Septiembre 2021 alagad an asegurasyon tataposon antes magsara an taon 2021.

Alagad nagpasalamat man giraray si Clavecilla na posibleng marealisar man giraray an bilyones peso sa pinakahuring pag-inspeksyon ni Tugade.

An DOTr Secretary nagsugo na sa contractors na taposon na an natatada pang mga patrabajo kan international airport.

‘‘Hangarin ko ho na matapos an konstruksyon, at maging operational an Bicol International Airport bago matapos an taong ito’’

Kun matapos na asin maging operation piglalaoman kan DOTr na maabot sa dos milyon na pasajeros an cada taon asin dakulang bagay sa turismo sa Bicol.

An proyekto pigpunan kan panahon ni dating Presidente Gloria Macapagal-Arroyo kan 2008 asin naabala an patrabajo alagad an pigdadahilan kan contractors huli kan pandemya asin bagyo na nagtama sa Albay.

An Regional Development Council (RDC) sa pamamayo ni Alcalde Noel Rosal nagpahayag na makaka-angat sa economia sa Albay asin rehiyon Bicol an BIA na haloy nang piglalangkag kan Bicolano. (dpa)