top of page

Bibong Night Market Ilalatag sa San Jose Partido

By Sonny Malate


San Jose, Camarines Sur--- Gigibohon sa banwaan na ini an bibo asin makolor na night market sa April 14 hasta 16, 2023 sa Patrocinio  asin Jacob Street, harani sa edificio municipal. Ini pinangaranan na “Banchetto de San Jose.”


An actividad  nasa pamamahala kan San Jose Partido Chamber of Commerce and Industry (SJPCCI) sa pamamayo ni Eddie C. Papaya. Ini  suportado kan local na gobyerno sa liderato ni Alkalde Jerold B. Peña.


Si Peña  iyo mismo an nag-encaminar sa sector na ini na magbilog nin grupo  mantang an negosyo asin pangkabuhayan kabale sa flagship program niya para sa saiyang banwaan.


Segun ki Papaya, an night market naiiba nin huli ta apwera sa mga mababakal na mga paninda sa pangbangging mercado mismo,  igua pa man ini nin mga local band performers, art exhibit kan mga matitibay na visual artist kan San Jose Partido. Magkakaigua pa man nin mga food cart na iguang panindang street foods, exotic foods, mga kakanin asin dakul pang iba.


Sequierra mga 60 nang mga local entrepreneur asin negociantes an  nagpareserba nin puwesto sa tolong aldaw na actividad.

Banchetto de San Jose sarong bibo asin makolor na night market



An night market iguang tolong klaseng puwesto, an native hut, tent asin food cart. Mababakal digdi an mga magagayon na native handicrafts, masisiram na mga pagkakan, baratong RTWs asin dakul pang iba.


An SJPCCI pigmukna kan Septiembre, 2022 sa pag-encaminar ni Alkalde Peña. Kabarale digdi iyo an mga entrepreneur asin negociantes na residentes mismo kan banwaan na ini. Siring man, mga taga ibang localidad na iguang negosyong namumugtak sa sinabing banwaan.


An mga negosyanteng ini invuelto magpoon sa saradit na establisemento comercial hasta sa dakulang negosyo arog kan gasoline station, hardware, resort asin iba pa.


Segun sa pamayo kan SJPCCI, an night market kapinonan sana kan mga actividad na saindang gigibohon asin  linalaoman na mapabaskog kan negosyo sa San Jose Partido.


Sa paagi kaini,  sinda naglalaom na an grupo ninda magigigin  actibong  contribuente sa pagparambong kan negosyo  asin kabuhayan sa San Jose Partido.


An “Banchetto de San Jose” posibleng pahalawigon pa hasta sa aldaw kan pintakasi kan banwaan sa Mayo 18-19, depende sa magigin resulta sa primerong tolong aldaw na paglatag kaini sa San Jose Partido.

Commentaires


bottom of page