Bicol dapat makumpleto nin special CAFGU-9th ID

Camp Elias Angeles, Pili, CSur --- An anom na provincia sa Bicol puedeng magcrear nin mga special Citizen Armed Forces Geographical Unit (CAFGU) base sa Executive Order 70 ni Presidente Rodrigo Duterte nganing pakusogon an campanya laban sa kumunistang grupo sa paagi kan pagcrear kan National Task Force (NTF) parte kan paghaman kan mga plano asin programa para sa katuninongan kan rehiyon asin bilang participasyon kan LGUs.


Si Army Capt. John Paul Belleza, opisyal na parataram kan 9th Infantry Division kan 9th ID nagpahayag sa Bicol Mail na an pinakaenot na 120 CAFGUs na nagtapos kan saindang training sa kampo kan militar hale sa provincia kan Sorsogon kasunod kan Memorandum of Agreement kan AFP asin ni Gobernador Chiz Escudero.

Si Gobernador Chiz Escudero (sa tahaw) kan Sorsogon, juespe de honor sa graduation ceremony kan 120 Special CAFGU na magiging katuwang kan LGU asin AFP sa campanya contra sa insurhencia sa saiyang provincia. Sa wala si Maj Gen Henry Robinson, jefe kan 9th ID kan Phil. Army sa Bicol. (9th ID)


Sa ginibong graduation ceremony kan nakaaging semana kan pinakaenot sa Bicol na special Cafgu kan Sorsogon naging presente si Escudero asin pinangenotan ni Major General Henry Robinson, Commanding General kan 9th ID.


Sinabi ninda Robinson asin Escudero sa saindang memorandum of agreement sa AFP, an superbisyon asin kontrol kan special Cafgu yaon man giraray sa 9th ID nganing mahale an pagduda na gagamiton sana sa politica mientras na nagrarani na an nasyonal asin eleksyon lokal sa Mayo 2022.


An sinambit na memoag puedeng i-adaptar kan gobernador sa ibang provincia sa Bicol na macrear kan special Cafgu alagad defende man giraray sa LGUs, sabi pa kan 9th ID.


Sinabi pa sa kasundoan an LGU Sorsogon iyo an may obligasyon sa ‘‘subsistence allowance’’ parejo kan regular na miembros kan CAFGU.


Sinda iyo an katuwang kan AFP nganing taposon na an problema sa insurhencia sa nasyon.


An provincia iyo man an matagama nin fondo para sa monthly allowance na nagcacantidad nin P6,000 cada miembro asin kun 120 Cafgu magastos an LGU nin P720,000 asin kun sa sarong taon kaipuhan mag-budget an provincia nin P8,640,000.


Sa Camarines Sur na aprubado na ni Gobernador Migz Villafuerte an ordinansa sa special Cafgu nakatalaan pang pinalisaron kan AFP asin Capitolyo an memorandum of agreement.


An jefe kan LGU kan Capitolyo asin Defense Secretary Delfin Lorenzana iyo an mapirma kan memoag.


Si Lt. Col Sisenando Magbalot Jr. iyo an battalion commander kan CAFGU kan 9th ID sa Bicol.


Nagpatanid man si Magbalot na kun gagamiton sa politica asin mabalga sa memoag an LGU, babawion kan Department of National Defense.


An kasundoan renewable cada taon, sabi pa kan opisyal kan 9th ID. (dpa)