Bicol Malasakit Center (BMC)

An BMC o Bicol Medical Center 91 anyos na ngonyan na taon.

Sa ika-90 anyos kaini kasurong taon 2023 magarbo si sarong semanang celebrasyon mala ta an kada departamento kan pinaka-dakulang ospital kan gobyerno sa Kabikolan nagcelebrar nin kanya-kanyang pag-guiromdom poon na mamundag an Camarines Sur Provincial Hospital bilang pinaka-dakula sa Kabikolan poon kadto sagkod ngonyan.

Nagpili ngani sinda nin Mr BMC asin Ms BMC, bako lang pinaka-magayon asin pinaka-gwapo kundi pinaka-mahigos, marhay an ugali asin marhay makipag-kapwa sa mga katrabaho pati pasyente asin mga bantay.

An BMC kan panahon abang ati asin an mga empleyados pati mga empleyadas lalo na an mga security guards, lalaki o babae, abang sasakri asin masiri sa mga pasyente asin mga bisita.

Mayong kortesiya, dae naghuhuyom o nag-ngingisi, pirming nakamurusdot na garong pig-uutangan.

Alagad poon kan 2016 kan magbukas an walong eskalon na edeficio sa tahaw kan mahiwas na propiedad kan gobyerno provincial sa may kalabaan kan Panganiban Avenue nagbago an lalawgon kan ospital pati an ugali kan mga tao asin kan manehamiento.

Kan ini Camarines Sur Provincial Hospital antes mag-martial law, palibhasa kapot kan mga politiko an kadaklan kan mga empleyado nombrado man kan mga opisyales kan gobyerno. Kaya an paghuna ninda sinda an may saderi kan ospital na sige an pang-angot bako lang sa mga pasyente kundi pati sa mga bisita.

Naguiguiromduman ko kaidto maski igwa man nin bulong pero pigtatago kan mga personahes kaya napipiritan an pamilya kan pasyente na magbakal sa luwas na mas mahal an presyo kan bulong sa pribadong botika.

Antes na maguin BMC an ospital kan gobyerno guinibo ngunang Bicol Regional Training and Teaching Hospital (BRTTH). Kan maguin chairman kan House Appropriations Committee idtong depuntong Rolando Andaya Sr, na naguin bise-gobernador man asin naguin congresista kan primer distrito guinibo niya an ospital na sarong Regional Center o BMC mantang an Bicol Regional Training and Teaching Hospital ibinalyo na sa Legazpi, idtong dating Albay Provincial Hospital.

Siyempre bastante an pundo kan Regional Hospital maski ngani an BRTTH yaon na sa Legazpi, an bagong regional center poon kan 1976.

Abang hiwas talaga kan kadagaan na sakop kan BMC mala ta an ABS CBN compound dating sakop pa kaini. An Boy Scouts asin Girl Scouts buildings ipigdonar pa pati an National Irrigation Administration (NIA) Regional office, an opisina kan Provincial Agriculturist, Philippine National Red Cross asin Department of Environment and Natural Resources ( DENR ), may mga eskwater na naka-erestar pa kaidto sa laog kan teritoryo.

An Gaisano Mall sa atubangan mismo kan ospital sakop pa kan mahiwas na teritoryo alagad kun tano ta ipinabakal ini sa pribadong sektor iyo an dae pa maintindihan sagkod ngonyan.

Kan maipabakal an mamahalon na propiedad sa pribadong kamot nagsurunod naman an lote sa centro kan Naga na natutugdukan kaidto kan dating Capitolio provincial, an lote kan Post

Office asin iba pa nagsurunod na. An dae na lang nadodotdot an grandstand na kataid kan Naga Central School asi Camhay. An Plaza Rizal pigmamanaho na kan Naga City LGU. Diyan kaidto guiniguibo an Kaogma Fiestival asin iba pang mayor na aktibidades/proyektos kan Cam Sur.

Segun sa mga pribadong doktor na nagseserbe sa mga pasyente kan BMC an problema ngonyan iyo an masakit na paradahan kan saindang mga awto.

Kun kuta na sabi ninda dae pigpabakal an kadagaan na iyan kan ospital marhay na kuta na an saindang parking o paradahan.

Kan panahon antes kan magayon na edipisyo abang kanos asin madiklomon an palibot kan ospital, an mga bantay sa pasyente nadidipisilan magtururog sa luwas ta mayo nin espasyo para sainda.

Kan panahon an entrada palaog sa ospital nasa walang tinampo ngonyan baliktad na ta an entrada yaon na sa to-o, an exit o paluwas yaon na sa wala.

Bago asin magayon an lalawgon asin ugali kan ospital siring man an mga empleyados y empleyadas. Naka-eresmile, magalang asin despwestong magtabang asin magtao sa mga pangangaipo nin tao.

Dating Provincial Hospital naguin Regional Center pero an mga taga-Naga maski may saderi man na city hospital nag-aaragawan pa kan servicio kan BMC sagkod ngonyan.

Igwa na nganing bago asin dakulang City Hospital an Naga pero sadit, nagbukas nin bagong City Hospital an Naga sa barangay Balatas pero kulang pa man guiraray. An Camarines Sur may bagong provincial hospital sa Bula pero abang rayo man sa kadaklan.

Si Senador Christopher “Bong” Go, chairman kan Committee on Health sa Senado iyo an nagbansag sa BMC na Bicol Malasakit Center alagad ngonyan maski iba an hiro kan bagong administrasyon nasyonal ni PBBM pero suportado man guiraray kan gobyerno an paguiguin compassionate center kaini: “May pagmakulog asin pagmalasakit sa mga Bikolano lalo na sa mga kinapobrehan. Compassionate Center ta bago na an adminstrasyon sa Malacaήang asin sa kongreso alagad an mga Bikolano parti kan naturalesa sa ugali na maguin matinabang asin may pagmakulog asin may pagmalasakit sagkod ngonyan”.

Apat na bulan akong nag-aprobitsar kan servicio kan Physical Rehab Center o Physical Therapy Center kaya namati ko an magayon na ugali kan mga pamayo asin mga empleyado na abang gagayon kan mga ugali asin hitsura, magagalang asin madaling dulukon.

An makuapo ko ngani balik-balik sa ospital na ini pero satisfechado kami kan sevicio asin tratamiento.

Congratulations BMC o tunay na Bicol Malasakit Center!

(Dae ko nungka malingawan an kadipisilan kadto sa ospital na ini kan ako maguin pasyente man na nakahigda sakama sa tahaw kan pasilyo asin kan magbantay ako sa sakong agom na duwang beses na nakuaanan asin dinara sa nasambit na ospital.)