Bicol matuninong sa anibersaryo kan CPP

Naging paborable sa Fuersa Armada kan Filipinas (AFP) na ibinasura na kan govierno an pagdeclara nin unilateral ‘‘ceasefire’’ antes kan Pasko sagcod na dai makahiro an rebeldeng NPA nganing maghasok nin kariribokan sa ika-53 na aniversaryo kan pagkakatugdas kan Communist Party of the Philippines kan Deciembre 26.


Dati-dati sa aniversayo kan CPP naglalansar nin opensiba laban sa tropa kan gobierno nganing ipaheling orog na ngunian na panahon nin eleksyon na makusog pa an saindang fuersa.


Si Army Major John Paul Belleza, opisyal na parataram kan 9th Infantry Division kan Philippine Army na may base sa Camp Elias Angeles, San Jose, Pili, Camarines Sur nagpahayag mas magayon sa sainda na mayong declarasyon kan ceasefire mantang kun igwang ceasefire ginagamit an panahon na ini magpakusog, magplano sagcod na mag-atake sa tropa kan gobierno.


Saiya pang sinabi na kan mga nakaaging taon kun igwang ceasefire sa panahon kan pagsabat kan Pasko asin Bagong Taon dai nahahale an mga pan-aatake kan mga rebelde na langtadan na pagbalga sa unilateral ceasefire.


Nagtutubod an 9th ID na si nagadan na apat na rebeldeng New People’s Army sa operasyon ninda sa Masbate kan Deciembre 17, nag-aandam kan saindang mga plano sa nakatalaan na anbersaryo.


Alagad sa anibersaryo kan CPP ngunian na taon heneralmente naging matuninong kabale na si pagsabat kan Pasko, afuera sana kan nangyaring encuentro kan militar asin kumunistang grupo kan Deciembre 25 sa barangay San Ramon, Barcelona, Sorsogon na nagadan an duwang armadong rebelde asin nabawi an duwang M16 armalite rifle asin mga subersibong documentos, sabi pa ni Belleza.


Ini resulta kan mga pinapaabot na sombong kan residentes kan barangay sagcod na nalansar nin operasyon an soldados kan gobierno asin PNP.


Sa kaparejong aldaw igwa man suhay na encuentro sa Camarines Norte, saro an binawian sa grupo kan mga rebelde.


Sa Camp Semion Ola sa Ciudad nin Legazpi, si Police Major Malou Calubaquib, parataram kan Bicol PNP nagsabi na heneralmente naging matuninong si pagsabat kan Pasko alagad igwa pang bunos na nagsuko an 17 rebeldeng NPA sa Sorsogon. (dpa)