Bicol nag-aatubang sa homa sa Covid pakatapos kan eleksyon

Nagpatanid an Departamento de Salud (DOH) na kun liwat magbungkaras an bagong variant kan Covid-19 an rehiyon Bicol posibleng dai makalibre mientras na pigkukunsiderar kan ahencia na poor performance an rehiyon sa vaccination laban sa virus.

Si Dr. Ernie Vera, regional director kan DOH nagsabi huli ta kadakle sa mga provincia kan satong rehiyon hababa an vaccination rate dai ninda hinahale an peligro na magkaigwa digdi kan ‘‘surge’’ sa Covid-19.

An opisina sentral kan DOH nag-aviso sa publico na namemeligro an ‘‘surge’’ sa virus pakatapos kan eleksyon sa Mayo 9, 2022 sa tahaw kan dai nasusunod an social distancing asin iba pang health protocols kan national IATF nganing makaibitar sa ‘‘deadly virus’’.

Digdi sa Bicol an enot pigdeclara sa Alert level 1 kan national IATF huli sa halangkaw an vaccination rate iyo an Ciudad nin Naga asin provincia nin Catanduanes mientras na base sa datus kan DOH sinda iyo an may halangkaw na vaccination rate mala ngani nakalampas na sa 70 percent na herd immunity.

An LGU Naga padagos pa kan saindang pagbabakuna sagcod sa mga menor de edad asin igwa pang naghahabol na senior citizens.

Hinagad kan DOH sa iba pang mga LGUs na hababa an vaccination rate na rikasan na an programa sa pagbabakuna nganing masakat na ninda an herd immunity para labanan an virus dawa hababa na an mga caso sa Covid-19.

Sa pinakahuring datus kan huring semana nagdadalagan na sa average na limang Covid-19 case aroaldaw mantang may minsa zero na sa caso.

Alagad an DOH nagpapadagos sa pagpagirumdum sa publico na magsunod sa health and safety protocols.

Sinabi ni Keen Nuyda kan Regional Epidemiology and Surveillance Unit (RESU) afuera kan huring average na caso igwang mga aldaw na zero na sa caso kan mga nakaaging apat na semana.

An hababang numero kan caso aroaldaw huli sa mga aksyon na ginibo kan mga lokal na gobierno asin publico sa paglaban sa Covid-19 mantang igwang pang nagpapadagos sa rollout kan vaccination. (dpa)