Bicol nag-zero na sa ASF

Pili, Camarines Sur --- Nag-zero na sa caso kan African Swine Fever (ASF) an rehiyon Bicol alagad igwang nagbalik na caso sa Camarines Norte asin Sorsogon, huli ta napuon palang nakontrol tolos nganing dai na mag-ulakit sa ibang barangay.


Kinumfirmar kan Department of Agriculture (DA) sa Bicol na nagbubuelta na sa normal an mga nag-aarataman nin orig maging sa mga barangay asin dakulang negosyante.


Si Emily Bordado, opisyal na parataram kan DA Bicol nagsabi na piglalaoman na dai na maulakit an virus sa hayop sa nagbutwang caso sa Talisay, Camarines Norte asin Gubat, Sorsogon.


Bulan pa nin Hunyo 2021 nag-zero na an caso sa ASF sa anom na provincia kan Kabikolan alagad igwang nagbutwang tigsarong caso sa Camarines Norte asin Sorsogon. Huli ta na-agapan tolos asin alertado na ngunian an paraoma matapos i-osip tolos sa saindang Municipal Agriculturist Officers.


An pig-aandaman na kan DA maging kan LGUs na masuplayan na nin atamanon na piglets an mga paraoma nganing maglangkaw an suplay kan karneng orig sa mga mercado.


Haros inabot nin duwang taon na apektado kan virus sa hayop an mga ataman na mga orig kan paraoma sagcod nagparakulang an suplay kan karne sa mga mercado na nagresulta nin pagparalangkaw kan presyo cada kilo.


Sa ngunian bastante na an suplay kan karne sa mga mercado matapos magkulpa an caso sa virus sa hayop alagad an presyo halangkaw man giraray dai naman na-kontrol kan Local Price Monitoring Council.


An ASF bako lang naglaila sa Kabikolan maging sa Luzon mantang digdi sa rehiyon cinco makakabawi na an mga paraoma.


Sa paglaban kan DA asin LGUs contra sa ASF nag-aabot sa labing 22,000 an na depopulate asin sagcod kan Hunyo 2021 nasa 14,296 na paraoma an nabayadan kan ahencia na igwa nang total na P87.7 milyon.


Puon kan bulan nin Hulyo 2021 an Philippine Crop Insurance Corporation (PCIC) iyo na an mabayad sa mga paraoma alagad kaipuhan nasa listahan sinda kan Registry System for Basic Agriculture Sector asin sa Municipal Agriculturist Officer. (dpa)