Bicol PNP nagpadarang augmentation force sa NCPO

Nagpadarang sarong platoon nin miembros kan Philippine National Police (PNP) an Camp Simeon Ola sa Ciudad nin Naga bilang augmentation force sa Naga City Police Office (NCPO) nganing igwang dugang na fuersa kan kapupulisan na mamantenir kan paz y orden ngunian na Peñafrancia fiesta.


Si Lt.Col. Errol Garchitorena, deputy City Director kan NCPO nagpahayag na an 24 miembros kan PNP makakadugang na fuersa sa pig-deployed na mga awtoridad sa Peñafrancia Basilica sa brgy. Balatas, Peñafrancia Shrine asin Naga Metropolitan Cathedral na posibleng dagsaon nin mga devotos an imahen ni Ina sa kaaldawan kan kapiestahan.


Madugang na fuersa nin elementos kan awtoridad sa central business district asin igwang mga magpapatrolia sa mga mall asin sa border control sa linderos kan Naga-Milaor asin Naga-Pili, sabi pa kan NCPO.


An pagwarak nin kapupulisan ginibo kan NCPO dawa na ngani nagpirmahan na sa Joint Declaration an City Hall sa pamamayo ni Alcalde Nelson Legacion, Arsobispo Rolando Tria Tirona kan Archidiocesis nin Caceres, City Director Col. Catan asin City Health Officer Dr. Vito ‘‘Butch’’ Borja na mayong mangyayaring actividades an lokal na gobierno asin an simbahan siring kan Traslacion procession asin Fluvial procession na pigruruso nin ribo-ribong devotos.


Limitado sa 30 por ciento an mga tawo sa laog kan simbahan base sa pigmamando kan national IATF.


Pig-eenganyar kan simbahan an mga devotos ni Ina asin Divino Rostro na gibohon na sa saindang mga residencia kasabay an nobenaryo sa simbahan envez na magpasiring sa Ciudad nin Naga.


An mga kanya-kanyang parokya kan caceres masabay man sa nobernaryo asin santa misa sa Naga Cathedral asin Peñafrancia shrine mantang live sa FB page.


Ika-duwang taon nang mayong actividades an ciudad siring kan regional military street competition, civic parade asin Miss Bicolandia beauty pageant.


Iyan iyo an mga kasundoan kan City Hall asin kan Caceres nganing maibitaran an ribo-ribong bisitantes kan ciudad. (dpa)