Bicol PNP naka-heightened alert sa anibersaryo kan NPA

Kun nag-aandam an New People’s Army (NPA) sa pagcelebrar kan saindang ika-53 na anibersaryo sa Marso 29, an Bicol PNP nagdeclara nin heightened alert sa posibleng paghasok nin karirikokan na kinaugalian na kan mga rebelde nag-aatake sa tropa kan gobierno sa aldaw kan saindang anibersaryo.


An Camp Semion Ola sa Ciudad nin Legazpi sa pamamayo ni PNP Brig General Jonnel Estomo nagpaluwas nin direktiva sa anom na Provincial Directors asin mga Municipal Police Stations na dapat maging alerto sa saindang mga area of responsibility sa pagcelebrar kan pagkakatugdas kan NPA nganing seguradohon na mantenido an paz y orden.


An paghasok nin kariribokan kan mga rebeldeng NPA dapat mapugolan mantang masikad na sa Marso 25 an campaign period sa mga candidato lokal asin an posibleng mag-implementar naman sinda kan permit to campaign asin permit to win sa mga nagcacandidato. An panahon nin eleksyon digdi man nagmamaniobra an CPP/NPA sa pagkolecta nin revolutionary tax sa mga candidato.


An 9th Infantry Division kan Philippine Army sa pamamayo ni Major General Alex DC Luna pig-alerto an gabos na batalyon asin grupo kan CAFGU laban sa mga rebeldeng grupo mantang nakatutok an saindang misyon contra sa insurhencia.


Nag-apelo an Bicol PNP asin 9th ID na kaipuhan an cooperasyon kan lambang namamanuan sa paagi kan pag-osip sa sainda kan mga hiro kan kalaban kan gobierno.


Bako lang pag-alerto sa ika-53 na aniversaryo kan NPA alagad prioridad pa kan awtoridad na maseguro an paz y orden nganing maging matrangkilo an nagrarani nang eleksyon nasyonal asin lokal.


Afuera pa kaini, sa nagdadangadang na semana santa nakaalerto an PNP mantang igwa nang mga banwaan asin ciudad na nasa alert level 1 na ibabalik na an tradisyonal na prusesyon si Amang Hinulid asin iba pang mga Santo. (dpa)

Bagong soldados kan 9th ID kan Phil Army sa Bicol kabale sinda sa 70 nagtapos sa training sa ika 125 anibersaryo kan Phil Army na ginibo sa Camp Elias Angeles, Pili, Camarines Sur (9th ID)