Bicol Republic

Marhay, maraot si nangyari kan naka-aguing eleksyon.

Nabisto ta si mga marhay na lider, politiko, botante, siguedores asin matitibay na Bikolano.

Pwede man palan magkasararo an mga Bikolano maski manlaen-laen an tataramon poon Camarines Norte, Camarines Sur, Albay, Sorsogon, Catanduanes asin Masbate.

Sa primerong pagkakataon poon kan panahon ni Raul Roco nagkaburunyog an mga Bikolano--- sa pagtulod kan kandidatura ni Maria Leonor Santo Tomas Gerona-Robredo para Presidente kan Republica kan Pilipinas.

Ako asin milyones na Bikolano asin Pilipino an odok sa boot na nagboto ki Leni Robredo sa pagtubod na siya an pinaka-marhay na kandidato, marhay an plataporma, mahigos, dakul naginibohan, alagad dai kita sinewerte.

Maski kan panahon ni Raul Roco dai nangyari na an mga Bikolano talagang nagkaburunyog para ki Robredo sa kadahilanan na iyo na ini talaga kuta an taon na magka-igwa nin presidenteng Bikolano tangarig mag-uswag an pagbuhay kan mga Bikolnon bako lang digdi sa satong rona kundi pati mga Bikolano na nag-iistar asin nagtatrabaho sa ibang parte kan Pilipinas asin kan kinaban.

Pero nin huli ta an binotohan kan mas dakul na Pilipino iyo an saiyang kalaban na si Bongbong Marcos mayo kitang maguinibo kundi mag-kooperar sa bagong gobyerno asin mag-andam para sa masunod naman na pirilian sa 2028 na Bikolano guiraray an maguiguin pambato ta para sa siring na posisyon.

Ngonyan ko lang namasdan na may mga pamilya na nagkabaranga dahil sa politika, BBM versus Leni: mag-aragom, magturugang, mag-arama, mag-irina asin magka-partidaryo.

Si naka-aguing eleksyon iyo an nagbungkag kan pamilya huli sa isyu nin politika.

Sa ngonyan maski dai nakatukaw sa pwesto si Leni Robredo iyo an pinaka-pusog na boses kan oposisyon na matuyaw kan mga kasalan asin pagkukulang kan bagong administrasyon.

Dakul pang siguedores si Leni maririsa mo sa social media bako lang digdi sa Bikol kundi pati sa Metro Manila, sa abroad duman sa America, Europa asin Australia.

May mga artikulo pa ngani an mga dyaryo asin mga babasahon sa abroad asin sa Manila na bako lang nag-oomaw ki Leni bilang pambihirang politiko kundi pati sa tolong niyang aki na nag-ereskwela sa mga sikat na eskwelahan sa Manila asin sa America. Garo pig-aandam na para sa masurunod na aldaw.

Inihong NGO na pig-aapod na “Angat sa Lahat Foundation” na garo sarong shadow government na may sadering kitchen cabinet kontrolado ni Leni.

Sa totoo lang pakatapos kan turno ni Congressman Gabby Bordado paka-agui nin tolong taon pwede si Leni kun gugustuhon niya na magbwelta bilang deputada kan 3rd district kan Camarines Sur. Pwede pang mag-gobernadora kan CamSur ta siya registrado bilang botante kan banwaan na Magarao.

Arin sa tolo niyang aking babae pwedeng magribay ki Mayor Nelson Legacion bilang alkalde kan Naga na dai matumang si Tato Mendoza o si John Bongat.

Sa pagka-gobernadora pwedeng magpahunod an saiyang mga pinsan na si LRay, Luigui asin Luis Miguel Villafuerte.

Apuera ki Leni an saro pang Bikolano na pambihira an liderato iyo si Congressman Joey Salceda kan Albay, chairman kan Ways and Means Committee sa Camara Baja, economic and finance consultant kan gabos na Presidente poon ki Ramos, Estrada, GMA, PNoy asin Duterte.

Dai pati nadadaog. Pugol niya an sadering banwaan na Polangui na iyo an pighahalian kan dakul na gobernador kan Albay asin ngonyan na eleksyon na porbaran na siya an tunay na “political godfather” kan regional center kan Bikol kan mapagana niya si Noel Rosal bilang gobernador kontra sa nadaog na si incumbent Al Francis Del Castillo Bichara.

Maski si Congressman Edsel Lagman kan primer distrito saludo ki Salceda ta an aki kaini iyo pa an nanggang bise-gobernador. Disiplinado an politika sa Albay sa lindong kan liderato ni Salceda ta an gabos na lideres nag-oorolay-olay sana. Siya an pigtitingag ngonyan bilang “smooth political operator” kan Bikolandia na pwedeng magpagana o magpadaog nin sarong kandidato.

An mga dinastiya sa Masbate (Kho) asin sa CamSur (Villafuerte) dai man nakiki-aram sa luwas kan saindang provincia bastang kontrolado ninda an mayoriya kan mga botantes sa saindang kanya-kanyang provincia.

An mga pangaran na Chiz Escudero, Robin Padilla asin Migz Zubiri tanog Bikolnon man, mga oragon kundi an saindang obligasyon ngonyan iyo an bitbiton an Bikol asin mga Bikolano sa saindang trabaho duman sa Camara alta o sa senado.

Sa lindong ni Leni Robredo asin Joey Salceda magaya-gaya an futuro kan vida politika sa rehiyon 5.