Bicol zero incident sa nagtapos na eleksyon

Narealisar an misyon kan Philippine National Police sa Bicol na dapat maging zero an insidente na may relasyon sa eleksyon nasyonal asin lokal kan Mayo 9, 2022.

Si Police Major Malou Calubaquib, opisyal na parataram kan Camp Semion Ola sa Ciudad nin Legazpi nagpahayag na zero incident an Kabikolan na may relasyon sa nagtapos na eleksyon dawa si mga lugar na yaon sa red category.

An bagong magtukaw na jefe kan PNP Bicol, P/BGen Mario Reyes kan magtukaw bilang direktor rehiyonal nag-orden sa mga Provincial Director asin mga jefe de pulisya na dapat seguradohon na zero incident an eleksyon sa Bicol asin ini nangyari man giraray sa kooperasyon kan publico asin mga politico.

Sinabi pa ni Calubaquib an provincia nin Masbate na pigpasa-irarum sa election hot spot mayong caso o insidente na may relasyon sa eleksyon.

An Masbate na cada panahon nin eleksyon yaon sa irarum kan election hot spot alagad ngunian na May 9, 2022 elections heneralmente matuninong an paz y orden.

An PNP asin Philippine Army parejong nagpadara nin augmentation force sa Masbate maging sa iba pang provincia kan Kabikolan nganing maseguro an matuninong asin honestong resulta kan pirilian.

Kun nagkaigwa man nin problema sa pirilian iyo an nangyaring pagpalyar sa nagkaperang vote counting machines (VCM) alagad an casong ini yaon na sa hurisdiksyon kan Commission on Election.

Maging an rebeldeng New People’s Army dai man naghasok nin kariribokan. (dpa)

Mga jovenes asin suportadores ni VP Leni Robredo nagtiripon alas 12:00 nin matanga sa Plaza Quince Martirez, nagkakaigwa kan saindang prayer rosary nabigla asin nagdududa sa partial result kan borotohan sa presidential elections. (tagapagMulat fb)