Bicol zero na sa caso sa ASF, sabi

Pili, Camarines Sur --- Declarado na kan Departamento de Agricultura (DA) na mayo nang caso kan African Swine Fever (ASF) sa orig poon pa kan Febrero ngunian na taon.

Ini an kumfirmasyon kan DA Bicol sa paagi kan saindang opisyal na parataram Lovella Guarin matapos kan mga warak-warak na caso kan Deciembre 2024 asin Enero 2025.

An ASF sarong ‘‘highly contagious’’ o delicadong helang sa mga atamang na orig huli ta madaling mag-ulakit sa sarong lugar maging sa pagtaraid na banwaan.

Sa mga enot na caso sa Bicol haros 100 por ciento an mortality rate asin dakulang epekto sa economia sa ‘‘pork industry’’.

Sa tahaw kan zero na sa caso sa ASF sa rehiyon alagad nagrereclamo an kunsumedores huli kan halangkaw na presyo sa mga mercado na inaabot na nin P400.00 cada kilo.

Sinabi kan DA na saro sa mga dahilan iyo an halangkaw an presyo kan buhay na orig na binabakal kan dayuhan na viajero nganing isuplay sa Metro Manila o sa ibang rehiyon.

An nangyayari nagkukulang an suplay mantang an lokal na may mga ataman na hayop sa dayuhan nang negosyante pinapabakal sa halangkaw na presyo an epekto kaini iyo an pagkulang-kulang nin suplay sa rehiyon.