Bicolanong international artist dae nalilingaw magsalingoy sa dagang namundagan

Ni Sonny Malate

DAWA saro nang famoso asin tinatangad na pangaran sa eksena kan Arte sa local o ibang nacion, dae nanggad nalilingaw na magsalingoy sa dagang namundagan si Maestro Pancho M. Piano.

Kan nakaaging bulan liwat na yaon sa Partido Area an midbid na multi-artist para sa art exhibit kan Salingoy Art Group, inapod na "Saluysoy," (river) sa Goa, Camarines Sur katakod kan pintakasi ni San Juan Bautista, Santo Patron kan Parroquia.

Sa bulan na Septiembre, arog kan mga nakaagin taon, linalaoman man na mabuwelta liwat si Piano sa ciudad nin Naga para sa taonan na art exhibit kan art group niya sa pagcelebrar kan Peñafrancia Festival.

Si Piano sarong orgulyong aki kan Partido, namundag sa coastal na barangay Mangogon, sa banwaan kan Lagonoy. Siya sarong premyado asin respetadong multi-artist sa laog asin luwas kan nacion.

An pagkatugdas niya kan Salingoy Art Group kan Deciembre 30, 2000 saro sa significanteng legacia niya sa Arte sa Kabikolan. Obheto kan grupo iyo an pagparambong kan cultura asin Arte sa Bicol sa paagi nin mga art exhibit, workshop, art lecture asin local art mural.

Sarong pambihirang virtud kan premyadong multi-artist iyo an dayaday na pagsuporta sa kapwa mga Bicolano na may talento asin passion sa visual asin iba-ibang art genre.

Segun ki Pancho, kan mga nakaagin taon an mga piyesa kan bagohan na visual artist sa art exhibit kan saiyang grupo pigbabakal niya tanganing magserbing motibasyon sa sainda na padagos magcrear nin mga piyesa.

Apwera kaini, may mga tinabangan man siyang mga tikapo alagad talentadong mga estudiantes sa saindang pagklase. Si Piano na gikan sa sarong simpleng pamilya nag-adal kan cursong Fine Arts bilang sarong Jose Joya scholar sa University of the Philippines (UP).

An midmid na Bicolanong multi- artist pambihirang may kabatiran sa iba-ibang art medium, alagad mas nagin midbid siya sa mga stained glass art sa mga simbahan bako sana sa Pilipinas kundi magin sa ibang nacion. Ini apwera sa mga mural asin ibang piyesa sa canvass na apreciado kan mga art collector.

Nanotaran kan mga art critic na an estilo asin hagod ni Piano sa mga piyesang may temang reliyoso, tradisyonal na osipon asin local na cultura nakakabaing sa mga obra ninda Fernando Amorsolo asin Carlos "Botong" Francisco na parehong National Artist.

Sa Bicol, midmid siya sa mga piyesang naglaladawan kan mga suanoy asin tradisyonal na osipon asin cultura kan rehiyon. Parati man laman kan saiyang mga makolor na obra an Imahen ni Virgen de Peñafrancia mantang siya sarong devoto ni Ina.

Apwera sa nagunong dakol na mga award gikan sa iba-ibang grupo, si Piano doceng beses na napiling Artist of the Year kan manlaenlaen na mga institution sa Bicol. Ganador man siya sa mga prestigiosong art competition digdi asin ibang nacion.

Nakalatag naman siya nin dakol na mga art exhibit sa Estados Unidos, Francia, Italya, Alemanya, Sur Africa asin dakol pang nacion. Sa mga lugar na ini, siya nakikitagbuan sa comunidad kan mga kababayan na mga Pinoy bilang pakikisumaro sainda.

Sa ngonian, si Maestro Pancho padagos sa pagigin sarong famosong decipulo kan Arte na harayo na an inabotan - respetado, premyado asin may halangkaw na valor an mga obra. Sa gabos kaini, siya humilde, mahuyo an boot asin dae nalilingaw sa pagsalingoy sa dagang linubngan kan saiyang inulnan.