top of page

Bikol Editoryal



Sa katangaan kan taon 2023 an satong editoryal o paninindogan kan dyaryo, kan publisher asin staff kan Bicol Mail sa tataramon na Bicol o pig-aapod na mother tongue kan Department of Education na tataramon kan Rehiyon 5.


Nag abot na sa ponto na ang lengwaheng Bicolnon ikinakasopog kan ibang mga Bicolano mismo lalo na itong nagka igwang dikit na inadalan.


Poon kan sarong taon kan mag luwas an librong ‘Ini an Totoo’ na katiriponan kan column ni Ernie Verdadero na piglansar mismo ni obispo Rolando Tirona, D.D. na ngonian lakop na sa dakol na lugar kan kinaban, poon Amerika, Europa, Canada, China, Australia asin manlaen-laen na probinsiya kan Pilipinas.


Apresyado na ngonian an tataramon na Bicolnon sa siring kan Ilocano, ka Pampangan, Cebuano, Chavacano, Waray, Ilongo asin an Tagalog na pig-basihan kan lengwahe nasyonal na Pilipino. Kung nagigiromdoman nindo kan magbukas an dyaryong ini kan 2002 antes mag surat nin regular na column si Bert De los Martires asin si Ernie Verdadero, si Vic Samson na yaun na sa Amerika nag tatrabaho, nag paparadara nin semanahan na column para sa mga para basa kan Naga asin Camarines Sur. Nag sunod naman ang Tigsik ni Aida Cirujales asin ni Sonny Malate, pero ngonian mas maogma ta an professor sa English na si Goyo Castilla asin si retired Lt. Al Villamora kan US Navy poro na nag susurat sa tataramon na Bicol na may kaibang pag orgolyo.


An Bicol Mail na nag poon kan taon 1954 sa liderato ni Leon SA. Aureus an premerong alcalde kan ciudad nin Naga konsideradong Best Edited Newspaper antes kan Martial Law. Alagad edineklara an Martial Law kan 1972, pinasara kan peryodiko. 20 anyos na nagturog an Dyaryo, sagkod kan 2002 kasabay kan pagbabago kan tunay na petsa kan pagka mundag kan ciudad nin Naga kan Hunyo 18, 2002.


Nagkaigwa na Bicol edition sa likod kan Dyaryo sa pangengenot ni Danny Aureus. Duman na nag poon na magimata an Bicolano na magayon palan an satuyang lengwaheng Bicolnon.


Mala ngonian, maski medyo nagmahal ang presyo kan kada kopya kan dyaryo bako lang igdi sa Naga, Iriga asin pag taraid na banwaan kan Camarines Sur kundi sagkod sa Legazpi, Daet asin ibang parte kan Bicolandia hanap hanap na kan tawo an “The Only Regional Newspaper” kan Bicolandia an Bicol Mail.


Saro o duwang beses kada taon maluwas an Bicol Editoryal kan Bicol Mail, bilang pag pagiromdom satu na igwa man kitang sadiring lenghawe bako lang tagalog o English.


Mabuhay an Bicolandia!


Mabuhay an lengwaheng Bicolnon!



댓글


bottom of page