BIKTIMA KAN CONCEPCION CRIMINAL GANG: Tolong mga kalansay nadiscobre sa Albay

Kinumfirmar kan Camp BGen Simeon Ola, Ciudad nin Legazpi an pagkakadiscobre naman kan tolong mga kalansay kan Concepcion Criminal Gang sa Sitio Tagbac, Barangay Macabugos, Libon, Albay kan Lunes, Febrero 5, 2024.

An mga biktima namidmid na kan saindang mga ka-familia alagad an duwa sa sainda menor de edad mientras na an ika-tolo nasa mayor na edad. Gabos sinda residentes kan kaparejong barangay na nawawara kan Deciembre 30, 2023.

Igwang concerned citizen an nag-osip sa Libon MPS sa pagkaka-discobre kan tolong bangkay na tolos man nagresponde an grupo kan Libon MPS, Albay PPO, 93rd Special Action Company, Regional Mobile Force Battalion 5 asin katuwang an NBI Bicol.

Sa inisyal na inbestigasyon an mga biktima naheling na kaibanan kan criminal gang antes nawara kan Deciembre 30, 2023 alagad hinulog palan sa ampas na posibleng mayo na nin buhay.

Dai palang nahahaloy nadakop kan mga miembros kan NBI si Ruel Cabras, kabali sa grupo kan Concepcion Criminal gangs. Siya an pigsasabing ‘‘executor’’ kan gang.

Nagtuga sa awtoridad na siya an responsabilidad sa pagpugot nin anom na biktima nagkapera nang taon an nakakaagi.

An saindang lider nabadil sa encuentro dai palang nahahaloy kan magprubar na magtomang sa awtoridad mantang inaarestar.