BIKTIMA KAN RICE TARIFFICATION LAW: 40% kan mga empleados saNFA Bicol hinale sa serbisyo

Bako lang sektor nin paraoma, kadamay an mga empleados kan National Food Authority (NFA) sa apektado kan Rice Tariffication Law (RTL) matapos mahale sa serbisyo an maabot sa cuarenta por ciento sa sainda mantang si anom na NFA Provincial Office sa Bicol ginibo na sanang tolong mga branch office.

Si Jaharah Sy Pavilando, opisyal na parapahayag kan NFA Bicol na si ibang mga opisyal asin empleados na tinunaw na an saindang departamento huli kan RTL napiritan na mag-aprovetsar kan early retirement.

An Camarines Norte asin Camarines Sur pigsaro na sanang branch office na namumugtak sa Pili, Camarines Sur mantang an provinciang ini igwang 35 municipalidades contra sa Camarines Norte na may doceng municipalidades alagad an provinciang ini ginibo nalang na satellite office.

Pigsaro man an Catanduanes asin Albay na an provinciang ini iyo an branch office asin satellite office an Catanduanes mantang pigsaro man an Masbate asin Sorsogon asin an provinciang ini iyo an branch office asin satellite office sa Masbate.

Pighalimbawa si dating Provincial Office kan NFA Camarines Sur cuarenta por ciento an nakabale sa retrenchment order kan opisina central asin an bagong branch office igwa na sanang 30 nawalat na mga empleados.

Si Domingo Pura iyo an nagtutukaw sa ngunian na branch manager kan NFA Camarines Sur alagad segun saiya si hinarale sa serbisyo binayadan kan govierno nin incentivo.

Alagad igwa pang nawalat huli kan security of tenure na maagi sa proceso kan Civil Service Commission mantang nagpapadagos pa an ‘‘restructuring’’.

Dawa pa binayadan namumundo an nawaran nin mga trabajo sa tahaw kan pandemya iyo pa an ginibo sa sainda kan presenting administrasyon.

Sinabi pa nangyari an ‘‘retrenchment’’ sa mga empleados mantang hinubaan nin punksyon an NFA, hinale na sa sainda an licensing, pagsuplay nin NFA rice sa mercado asin an nawalat nalang nindang obligasyon iyo an magiging bodigero nin bagas para sa food security asin magbakal paroy kan mga paraoma.

Magigirumduman kan dai pa pinipirmahan ni Presidente Rodrigo Duterte an Acta Republica 11203 na mas midbid sa Rice Tariffication Law an sektor nin paraoma asin an mga obreros kan NFA nagcocontra sa ley, alagad dai sinda dinangug ni Duterte na dagos nang pinirmahan an RTL kan Febrero 2019.

Si Senador Cynthia Villar iyo an nagpadreno kan bill sa senado.

An natawan sana nin pabor digdi iyo an mga higanteng rice traders mantang tinao na sa sainda an pag-angkat nin bagas na iyo an nagsusuplay sa mercado asin iyo pa an nagdidikta kan presyo.

Mas lalong agraviado an mga paraoma huli ta hababaon an presyo kan saindang inaning paroy sa mga kumprador epekto kan Rice Tariffication Law.

Si Congressman Gabby Bordado kan tercer distrito kan Camarines Sur pig-aadalan na an ‘‘pros and con’’ kan RTL nganing magsangat siya nin bill sa 19th Congress nganing dagos nang ibasura an ley sa tahaw kan mas lalong pinatios an dati nang pobreng mga paraoma asin ginatos pang empleados kan NFA an nawaran trabajo.

Sa presenting congreso dai pa siya makahiro huli ta kapot pa ni Duterte an mayoriang miembros kan Camara-Baja. (DPAureus)