BILANG GM KAN CASURECO 1: Alsisto sagcod sa Dec. 30

Dai na tataposon ni General Manager Ana Sylvia M. Alsisto an saiyang posisyon sa Camarines Sur I Electric Cooperative (Casureco I), Inc. na pinalawig kan miembros-consumedores sa paagi kan AGMA hasta Deciembre 31, 2023 asin inaprubaran kan junta directiva kan Agosto 6, 2021 envez naghurot sa junta directiva ‘‘please accept my retirement as General Manager effective December 15, 2022.’’

Alagad sa desisyon kan junta directiva sa board meeting kan Deciembre 3, 2022, sinabi sa Bicol Mail ni Director Concordio ‘‘Jun’’ Romano kan Libmanan District nganing tawan nin panahon si Alsisto sa preparasyon kan saiyang pagretiro inaprubaran hasta sa Deciembre 30, 2022.

Sa onseng (11) taon bilang general manager alagad an pitong (7) taon, siya multi awarded sa sunod-sunod na taon na Triple A an cooperativa na an onra tinao kan NEA.

Si Engr. Noel Laureles saiyang pigrerecomendar na magtukaw Officer-in-Charge.

An surat ni Alsisto sa junta directiva petsado Noviembre 28, 2022 na naka-address sa Board of Directors kan cooperativa nin electricidad.

Sinabi kan general manager na an AGMA resolution No. 06 na pinapalawig an saiyang ‘‘term of office’’ hasta sa Deciembre 31, 2023 kinumfirmar kan junta sa paagi kan Board Resolution No. 159, series of 2021. Sinumiter ini sa National Electrification Administration (NEA) kan Agosto 6, 2021 na sagcod sa ngunian mayong ‘‘reply’’ boot sabihon deemed approved. Alagad kinumfirmar na padagos siyang reconosido kan ahencia bilang GM kan Casureco I. Poon kan pagpalawig kan saiyang ‘‘term of office’’ padagos siyang reconosido kan NEA sa paagi kan mga pinapadarang komunikasyon.

Saiya pang sinabi sa surat ‘‘However my stand as Casureco III Task Force Chairman and Advocate of the rural electrification program in opposing Bicol Light and Power Corporation may expose the NEA to strong political pressure to the detriment of Casureco I, the institution that I have worked for devotedly in 39 years, 11 of those as General Manager.

An ibang mga miembros-consumedores nagtutubod an desisyon na ini ni Alsisto huli sa ‘‘political pressure’’ asin mga pinapaluwas na fake news na habo na niyang patolan.

An general manager bestadong pusog na nagkokontra sa House Bill No. 1084 o Bicol Light and Power Corporation na pigtutulod ninda Congressman LRay Villafuerte, Congressman Migz Villafuerte, Congressman Tsuyoshi Anthony Horibata asin Congressman Nicolas Enciso VIII.

Enot nang pinaluwas sa FB page kan congresista kan segundo distrito an saindang katuyohan kan bill bakong take over kan Casureco III envez kumpetensya nganing mapababa an tarifa sa kuryente asin mahali na an mga nangyayaring brownout. (dpa)