Billy D’ King Taga Bagacay

Kan aki pa si Raul Villamor, bantog kaidto sa saindang baryo na iyo an Bagacay sa banwaan nin Tinambac an sarong maskuladong lalaki na iguang bansag na Billy D’ King. Si Raul na gikan sa mayaman na familya sa Tinambac alagad iguang residencia sa Bagacay ta an saiyang mga ninuno iyo ang orihinal na nagpapa dalagan nin mga lantsa na nagbibiyahe hale sa pantalan kan Bagacay pasiring sa mga kostal na baryo kan tinambac arog baga kan Bani, San Vicente, Daligan asin Campo Cuatro, derecho sa banwaan nin Siruma. Iyo iyan an solamenteng means of transportation kaidto na minaagi sa San Miguel Bay. Magayon asin masagana ang baryo kan Bagacay ta igua nin 2 pantalan, ini ang Rances Port asin ang Sana Ana Port. Digdi sa pantalan pig didiskarga an mga produkto arog kan kamote, kamoteng kahoy, Paroy, batag, mga gulayon, mga hayop arog kan orig asin manok. An mga aki sa lugar maogmang nagkakarawat ta Sagana an saindang pagbuhay, ang gabos na tawo iguang hanapbuhay asin ang kadaklan saindang mga para sira sa San Miguel Bay. An fiesta kan Bagacay minapatak tuyong Junio 13 kasabay an fiesta sa Camaligan, an fiesta digdi pinag dadayo ta ang mga pighahanda iyo an mga darakulang sira , darakulang pasayan asin darakulang kasag. Sa istorya ni Raul, sindang mga aki, marikas na nagdudurulag papule sa harong kung nahihiling ninda na nagdadangadang na si Billy D’ King ta ipinabisto sainda kan saindang mga magurang na ini ang tawong aki nin Hegante ta ini halangkaw asin maskulado asin saro ining boksingero. Sa saindang pagdakula, dai na ninda naisihan kun sain nag iistar si Billy D’ King, iguang nagsasabi na ang harong kaini harani sa bukana kan Bagacay na naka atubang sa kadagatan kan San Miguel Bay, na garo man lang pinag sasabi na saro ining ermitanyo kan Bagacay. Maski ngani sinasabing saro ining boksingero alagad ini palan dai pa naka experiencia na makipag boksing ta ang trabaho kaini iyo ang mag dakop nin sira asin mag kua nin bakawan, kaya palan siya inapod na boksingero ta lapnad ang dungo kaini resulta nin deperencia sa pagkamundag. An dai nanggad naisaray na istorya kan mga taga Bagacay iyo na kung sain hale sa Billy D’ King ta ini halangkaw, maskulado asin mestizo. Alagad an siisay man sa Bagacay matubod na si Billy D’ King sarong erencia nin mga kastila na nainot na nag istar sa Tinambac asin dai nailista ang apelyido kaini.