Bilog na aldaw kan Undas 2025 matuninong – PPO CSur

Matuninong si paz y orden sa provincia nin Camarines Sur sa bilog na panahon kan Undas 2025 mantang nasa heightened alert an PNP Provincial Office nganing maseguro an seguridad sa mga kamposanto.

Si PCol Virgilio Olalia, Jr. Provincial Director kan Camarines Sur nagpasalamat sa publico sa cooperasyon para maseguro an seguridad sa saindang pagbisita sa mga kamposanto.

Napag-araman na igua man giraray nagpalusot nin arak paglaog sa kamposanto nganing magtagay alagad mayo man nagpasaway.

Sinabi ni Olalia na 1,500 an saiyang pigwarak na kapupulisan para sa operasyon asin igua man nakadestino sa mga Police Assistance Center sa kamposanto, alagad an mga nawalat sa Municipal Police Stations iyo man an mga nakaandam nganing magresponde sa ano man na insidente.

Afuera kaini, igua man nakadestino sa pagmantenir sa bulos nin trafico katuwang an ibang miembros kan Public Safety Office kan lokal na gobierno.

Pinangenotan pa kan PD an inspeksyon sa mga MPS sa aldaw kan Undas 2025, Noviembre 1, 2025.

An saiyang pag-inspeksyon nganing macierto an ‘‘Ligtas Undas 2025’’ nganing macierto an seguridd sa mga kamponsanto.

Saiya man pinasalamat an an serbisyo kan mga pulis para maseguro an seguridad sa publico sa pagrumdum kan Undas 2025.