BINAKAL KAN CITY HALL: Suplay kan AstraZeneca maabot sa Hunyo, sabi

Ciudad nin Naga --- Piglalaoman kan City Hall kun dai maabala maabot na an saindang suplay nin bakuna sa masunod na bulan nin Hunyo 2021 matapos pirmahan na ni Alcalde Nelson Legacion an purchase order na babakalon na AstraZeneca vaccine.


Si Consejal Sonny Rañola, Chairman kan Committee on Health sa Sangguniang Panlungsod nagsabi kun marealisar na makaabot na sa masunod na bulan an suplay kan bakuna dapat mapunan tolos an vaccination sa mga residente kan ciudad.


An gobierno lokal haloy nang nagtagama nin Php50 milyon na fondo nganing ibakal nin bakuna contra sa coronavirus disease alagad an problema an abalang pag-abot kaini mantang kadakul man na nasyon asin gobierno lokal an nag-order kan AstraZeneca vaccine.

Mga senior citizens pigpunan nang tudukan nin bakuna na ginigibo sa JMR Coliseum, Ciudad nin Naga. (CEPPIO)


Ini dawa na ngani nagkapera an pharmaceutical company kan bakuna sa ibang mga nasyon mala ngani an Filipinas dai man nakabale sa natawan nin prioridad envez si mga mayayaman na nasyon.


Dinagdag pa kan consejal na igwa nang total na Php63-M mantang an dugang na Php13-M maghahale na sa fondo sa pagpagayon kan Plaza Rizal na inaprubaran na sa sesyon kan SP.


Segun ki Alcalde Legacion na enot nang nag-asegurar sa Nagueños an implementasyon sa pagbakuna contra sa Covid- 19 para sa gabos o ‘‘ubos, gabos kun gabos’’ asin sa mga pahayag kaini sa media kan nakaaging semana dai mahahaloy maabot na sa ciudad an suplay matapos saiyang pirmahan an PO.


Nangangahulogan an matutudokan nin bakuna maabot sa 224,668 na residentes kan ciudad o 100 por ciento kan populasyon.


Sa orinihal na plano an mass vaccination masikad ngunian na Mayo 2021 alagad nagpalyar mantang na-aabala an pag-abot kan suplay kan AstraZeneca.


An vaccine na hale sa British-Swedish multinational pharmaceutical-biopharmaceutical company igwang 70-90 percent efficacy asin an presyo cantidad Php610.00.


An sinambit na vaccine iyo an napili kan City Hall sa apat na iba pang mga companiya na hale sa Russia asin China.


Mientras tanto sa taon 2022, liwat ma-alokar nin Php50 milyon sa annual budget kan ciudad para sa 50 por ciento kan bilog na populasyon kan ciudad.


Igwa nang enot na tudokan kan Sinovac vaccine hali sa suplay kan Department of Health (DOH), alagad an pig-prioridad iyo an mga health workers, frontliners asin sa ngunian an senior citizens na ginibo sa Jesse M. Robredo Coliseum. (DPA)